Mere Ghar Ke Samnay

میرے گھر کے سامنے

رات کی گاڑی کا ایک پہیہ نکل گیا

میرا بیٹا اس پہیے سے کھیلتا ہے

گاڑی کو لینے کوئی نہیں آیا

اس دن سے میرے گھر میں

اخبار نہیں آیا

دودھ نہیں آیا

پرندہ نہیں آیا

اس دن کے بعد

میں نے اپنی نظم میں کوئی شکار نہیں کھیلا

میں اپنی نظم کے اندر خاموش ہو گیا

اور میری نظم آہستہ آہستہ میرے لیے پنجرہ بن گئی

رات کی گاڑی کو لینے کوئی نہیں آیا

انہوں نے جان بوجھ کے ایسا کیا ہے

وہ میرے دل میں بچی کھچی چیزوں کو شکار کرنا چاہتے ہیں

شاید وہ نقشہ چرانا چاہتے ہیں

کچھ لوگ رات کی گاڑی سے نیچے اترے

میرے اناج کے کمرے اور میری نظموں کی تلاشی لی

اپنی حفاظت کے لیے

کچھ ہتھیار میں نے ان نظموں میں چھپا رکھے تھے

اب میرے پاس چند ڈرے ہوئے لفظوں اور چھان بورے کے سوا کچھ نہیں

انہوں نے میرے بیٹے کی کتابیں چھین لیں

اور اپنی لکھی ہوئی کتابیں دے دیں

اور کہا ہم تمہارے ہی گھر میں

تمہاری نظموں کے لیے ایک مخبر تیار کرنا چاہتے ہیں

رات کی گاڑی کا پہیہ مجھے اپنے سینے میں اترتا ہوا محسوس ہوا

میرے گھر کی ہر شے پہیے میں بدل گئی

حتی کہ میری باتیں بھی پہیہ بن گئیں

اور پھر یہ پہیہ میری تاریخ بن جائے گا

اس تاریخ سے بہت سارے بچے پیدا ہوں گے

وہ رات کی اس گاڑی کو کھینچیں گے

لیکن اس وقت تک رات

اپنی جڑیں چھوڑ چکی ہوگی