Shaheed Hamesha Zinda Rehte Hain

Aj Mai Subah Utha To Hasb E Mamul Nashte K Baad Akhbar Pe Nazar Dali..Heading Daikhi To Mai Dang Reh Gaya, Mere Poore Jism Me Sard Se Ek Leher Sarayat Kar Gayi…ISI K Sabiq Officer Col Imam Ko Qatal Kar Dia Gaya..Khabar Daikhte Hi Mere Pairon Tale Zameen Nikalne Lag Gai.Yaqeen Nahi Aa Raha Tha K Qaum Ka Aik Or Janbaz Sapoot Jo Goli Khane K Lye Fauj Me Bharti Huwa Tha Akhir Goli Ki Nazar Ho He Gaya.Kon Kehta Hai Wo Maut Se Darne Walon Me Se Tha.

Col Imam K Bare Me Likhna Asal Me Meri Un K Sath Aik Ghaibana Dilli Rishta Or Jazbat Hain.Jo Mujhe Aj Un K Bare Me Likhne Par Majboor Kar Rahe Hain.Bachpan Me Hamain Abu Aksar Apne Fauji Zamane Ki Yadain Sunathe The.Inhi Kahaniyon Me Col Sultan Amir Ka B Bahut Zikar Karte The K Wo Aik Bahut He Nidar, Dilair Or Zeerak Colenal The.Or Phir Hamain Unki Bahaduri Ki Kahaniyan Sunathe The Or Hum Shauq Se Sunte The.Aj Jo Mujhe Unki Kahaniyan Yaad Hain To Aik Din Abu Kehne Lage K Col Sahib Hamain Jismani Tawar Par Mazbut Or Sakht Rakhne K Lye Hamain Rozana Miloon Dawraya Karte The.Aik Din Mashq Karte Karte Unh Ne Mujh Se Apni Banduq Chen’ne Ki Koshish Ki ..Maine B Banduq Ko Mazbuti Se Pakra Huwa Hai.Mai Apni Taraf Ise Kainch Raha Hun Or Col Sahib Apni Taraf..Is Dawran Col Sahib K Bhangi Ne Mujh Se Kaha K Banduq Col Sahib K Hawale Karo.Maine Kaha Nahi Banduq Aik Sipahi Ki Shaan Hoti Hai Uski Zaiwar Hoti Hai Or Mai Ise Kabhi Kisi K B Hawale Nahi Kar Sakta .Is Bat Se Col Sahib Bahut Khush Huye Mujhe Shabash Di Kandhe Pe Taptapaya Or Hanste Huye Mujh Se Age Nikal Gaye.. Aik Or Moqa Par Uski Sharafat Or Apne Sipahiyon Se Us Ki Lagaw K Bare Me Kehte Huye Mere Abu Ne Kaha K Jb 1982 Me Meri Aik Tang Toot Gayi Thi Or Mai CMH Me Dakhil Tha Tab Apni Be Panah Masrufiat K Bawajud Col Sahib 2 Baar Mujh Se Milne Aye The Or Meri Khairiat Pochi Thi.Aik Baar Jab Unki Unit Peshawar Me Thi To Aik Din Parade K Dawran Aik Taraf Se Col Sahib Namudar Huye Wo Fauran Mere Pas Aye Or Aa Kar Mere Dono Hathon Ko Pakarh K Apne Dono Kandho Pe Rakha Or Apne Dono Hathon Se Mere Dono Kandhon Pe Rakh K Mujhe Peeche Le Jane K Lye Zor Lagani Shoru Ki.Dono Aik Dosre Ko Peeche Le Jane K Lye Zor Azmayi Kar Rahe The K Is Dawran Mere Abu Torhe Se Peeche Ki Taraf Chale Gaye Kyun K Mere Abu Ki Nisbat Wo Kafi Mazbut Or Sakht Jaan The.Bad Me Maine Unk Bare Me Parha To Daika K Wo Sarhe 8 Saal SSG Me B Reh Chuke The Or Apne Batch K Topper The Is K Elawa Fort Bragg, North Carolina, USA Me Training K Dawran Apni Sakht Jaani Or Bahaduri K Sille Me Un K Commander Ne Unhain American Green Beret Se B Nawaza Tha..In K Elawa Or B Bahut Si Batain Hain Jo Abu Ne Hamain Sunayi Then.Jin Dino Wo Apne 2 Sathiyo Sq Leader (R) Khalid Khwaja Or Britian Journalist Asad Qureshi Samait North Waziristan Me Asian Tigers Nami Tanzeem K Hathon Ighwa Hoye The To Media Or Akhbarat Me Col Imam K Naam Se Un K Bare Me Bahut Kuch Parha Or Jaana.Aik Din Me Internet Pe Iftikhar Ahmed K Sath Unki Aik Interview Daikh Raha Tha .Mere Abu Kamre Me Aye Or Daikha To Jhat Se Bole Are Ye To Hamare Col Sahib Hain Maine Kaha Haan Ye Col Imam Hain Par Maine To Ap K Muun Se Kabhi Is Col K Bare Me Nahi Suna Kehne Lage Yahi To Hai Wo Col Sultan Amir Jin K Bare Me Mai Aksar Sunatha Tha.Ye Sunte Hi Mai Dang Reh Gaya.Yaqeen Nahi Aa Raha Tha Maine Kaha Ap Ne To Is K Bare Me Kuch Nahi Bataya Hai Is K Bare Me To Maine Abhi Bahut Kuch Jaana Hai.Phir Mere Abu Barhe Inhimak Se Interview Sun’ne Lage Ye Tho Tha Tasvir Ka Aik Rukh Ab Tasvir K Dosre Rukh Ki Taraf Ate Hain Jo Maine Col Sahib K Bare Me Khud Parha Hai.

Col Imam Isi K Additional Director General The. Tarar Khandan Se Taulaq Rakhne Wala Or Na Sirf Chakwal Bal K Pore Pakistan K Is Janbaz Sapoot Ne Afghan Jihad Me Aik Muassar Kirdar Ada Kia.1974 Me Zahir Shah K Takhta Ultane K Baad Jab Sardar Daud Aye Or Unho Ne Russia K Kehne Pe Pakistan Mukhalif Policy Apnayi Or Communism Ki Parchar K Lye Razamandi Zahir Ki To Us Waqt Government Ki Policy K Tehet Wo Afghanishtan Chale Gaye Ta K Wahan Afghan Logon Ko Training Dai K Soviet Union Ka Muqabla Kia Jaye Ta K Communism Ka Ye Nasoor Kaheen Pakistan Ki Sarhad Me Dakhil Na Ho Jaye.Phir Soviet Union K Nikal Jaane K Baad Afghanistan Me Civil Jang K Khatme Or Taliban Hakumat K Qiam Me B Unka Aik Bahut Barha Kirdar Hai.Wo Mullah Muhammad Umar K Trainer Reh Chuke Hain Is K Elawa Wo Maujuda Afghan Sadar Hamid Karzai K Bahut Karibi The.Soveit Union Ki Shikast Or Communism K Mun K Bal Girne K Baad Joerge Bush Senior Ne Unhain White House Me Bulaya Or Apne Khasosi Iezaz Berlin Hill Se Nawaza.Is K Elawa Use Sitara-E-Jurat,Tamgha-E-Basalat,Sitara-E-Imtiaz K Izazat Se B Nawaza Gaya Tha.1994 Me Brigadier K Uhde Par Wo Retire Hone K Baad 1996 Me Benazir Hakumat K Dawran Wo Herat Me Pakistan K Consul General B Reh Chuke Hain.Wo Aik Anmol Commander Or Guerilla Tarz E Jang K Mahir The.Qaum K Is Namwar Sapoot K Karnamain Sunehri Haroof Se Likhne K Kabil Hain.Ane Wali Naslain Un Par Fakhar Karainge Or Use Salam Karainge.Shaheed Hamesha Zinda Rehte Hain.