خورشید ملت کی سالگرہ

3جنوری 1924کوتحریک پاکستان کے ایک سرگرم کارکن ، قائد اعظم کے دست راست، محترمہ فاطمہ جناح کے منہ بولے بیٹے،آزاد کشمیر کے پہلے صدر، ایک مایہ ناز کشمیری رہنماء خورشید حسن خورشیدکی سالگرہ کا دن ہے۔ خورشید ملت ،کے ایچ خورشید کے بارے میں قائد اعظم بانی پاکستان نے فرمایا کہ پاکستان کو انھوں نے، ان کے سیکریٹری(کے ایچ خورشید) اور ان کے ٹائپ رائٹر نے بنایا۔پاکستان قائم کرنے والوں میں ایک کشمیری کا کلیدی کردار ہے۔قیام پاکستان میں کے ایچ خورشید مرحوم اور ان کے ٹائپ رائٹر کا کردار انتہائی اہم تھا کہ قائد اعظم نے اس کا خود اعتراف کیا تا کہ ریکارڈ درست رہے۔خورشید صاحب نے صدر بننے پر آزاد کشمیر میں سڑکوں کا نیٹ ورک بنایا۔ جاگیرداری سسٹم کا خاتمہ کیا۔ عوام کو ووٹ کا حق دیا۔ سیاستدانوں کو عوام کے در پر لا کھڑا کر دیا۔ کشمیری انھیں خورشید ملت قرار دیتے ہیں۔کروڑوں مسلمانوں میں سے قائد اعظم کی نظر اس ہونہار نوجوان پر ہی پڑی۔ کے ایچ خورشید سرینگر میں پیدا ہوئے۔ ان کے والد محترم مولوی محمد حسن اسلامیہ ہائی سکول راجوری کدل سرینگرمیں استاد تھے۔ ان کے والد نے قیام پاکستان کے بعد جہلم کے قریب سرائے عالمگیر ملٹری کالج میں بغیر تنخواہ رضاکارانہ تدریسی خدمات انجام دیں۔کے ایچ خورشید کے بھائی عبد العزیز فردوس کشمیر میں بخشی غلام محمد صادق کے دور میں چیف کنسرویٹر جنگلات کے طور پر ریٹائر ہوئے۔ ان کا ایک مکان سرینگر کے آبی گزر علاقہ اور دوسراجموں کی ریذیڈنسی روڈ پرمعروف صحافی جناب وید بھسین کیپڑوس میں تھا۔خورشید صاحبنے ہی کشمیر مسلم سٹوڈنٹس فیڈریش بنائی۔ 1942میں وہ قائد اعظم سے جالندھر میں ملاقی ہوئے۔ کے ایچ خورشید اپنی ڈائری میں لکھتے ہیں کہ اس موقع پر قائد اعظم نے انھیں مسلم لیگ کا ایک پرچم دیا ۔ آپ کے والد محترم کا تعلق جموں اور والدہ کا سرینگر سے تھا۔ ابتدائی تعلیم وادی کشمیر اور گلگت میں حاصل کی۔ پھرسرینگر ایس پی کالج میں زیر تعلیم رہے۔ وہ طلباء سیاست میں کافی سرگرم تھے۔ بعد ازاں برصغیر کی پہلی مسلم پریس ایجنسی ’’اورینٹ پریس آف انڈیا لمیٹڈ‘‘ (او پی آئی)کے کشمیر میں نمائیندہ مقرر ہوئے۔اس کی شاخیں کلکتہ، پٹنہ، لکھنوء اور لاہور میں بھی تھیں۔ اس طرح انھوں نے قومی آزاد صحافت میں قدم رکھا۔ یہ ایجنسی انوسٹی گیشن میں زیادہ دلچسپی رکھتی تھی۔ جب ہندوستان ٹائمز نے بنگال کے وزیراعظم جناب اے کے فضل الحق کا ایک فرضی بیان مئی 1941کو قائد اعظم کے بارے میں شائع کیا۔ تو اورینٹ کی کلکتہ شاخ نے انوسٹی گیشن کے بعد فضل الحق مرحوم کا درست بیان شائع کر کے دونوں مسلم رہنماؤں میں غلط فہمیوں کو دور کر دیا۔

قائد اعظم جب اپنے وادی کے پہلے دورہ پر سرینگر آئے تو کے ایچ خورشید نے ہی ان کے دورہ کی رپورٹنگ کی۔ قائد اعظم کا انٹرویو لیا۔ قائد کو اس نوجوان میں قابلیت کے جوہر دکھائی دیئے۔پھر ایک وقت آیا جب قائد اعظم نے مسلم لیگ کا پرچم کے ایچ خورشید کو دیتے ہوئے کہا کہ یہ آپ کا پرچم ہے، اسے تھام لیں۔مسلم پارک نوہٹہ سرینگر میں 1944کوجب قائد اعظم نے ان کی تقریر سنی تو اسی وقت انہوں نے ایک اہم فیصلہ کیا۔قائد اعظم کے پرائیویٹ سکریٹری مسٹر لوب تھے۔ وہ تقاریر کا انگریزی سے اردومیں ترجمہ کرنے میں دقت محسوس کرتے تھے۔ کے ایچ خورشید نے اس سلسلے میں تعاون کیا۔ قائداعظم نے ان کے کام کی تعریف کی اور انہیں پہلی اسائنمنٹ دی۔ قائداعظم کے سرینگر میں قیام کے دوران کے ایچ خورشید کی ان سے مسلسل ملاقاتیں ہوئیں۔ کے ایچ خورشید مرحوم کو قائد اعظم نے اپنا سیکریٹری مقرر کرنے کی پیشکش کی۔ قائد اعظم نے کے ایچ خورشید کو بمئی ساتھ چلنے کو کہا۔ ان کے والد اس پر ہچکچائے۔ تو قائد نے بتایا کہ آپ فکر مند نہ ہوں ۔ میں ان کے مستقبل پر توجہ دوں گا۔ یہ ایک وعدہ تھا جو پہلے قائد اور ان کے بعد ان کی ہمشیرہ محترمہ فاطمہ جناح نے وفا کیا۔ انھوں نے خورشیدصاحب کولنکن ان سے بار ایٹ لاء کرایا۔ اور وہ بیرسٹر بن گئے ۔ قائد اعظم نے خورشید صاحب کو شیخ محمد عبداﷲ سے ملاقات کے لئے سرینگر بھیجا۔ وہاں انہیں گرفتار کر کے جیل بھر دیا گیا۔ قائد اعظم نے پنڈت نہرو کو خط لکھ کر رہائی کا مطالبہ کیا کہ میرا کام بہت متاثر ہو رہا ہے۔ قائد کی زندگی میں خورشید صاحب کورہائی نہ ملی۔ لیکن محترمہ فاطمہ جناح نے رہائی کی مہم جاری رکھی۔ بعد ازاں انھیں ایک بھارتیبرگیڈیئر گنسارا سنگھ جو کہ مہاراجہ ہری سنگھ کا قریبی عزیز تھا،کے بدلے رہائی ملی۔اسے گلگت میں آزاد فورسز نے قید کیا ہوا تھا۔پھر ایک وقت آیا جب خورشید صاحب نے وزیر خارجہ بھٹو صاحب سمیت 24مئی1964کو چکلالہ ائر بیس پر شیخ محمدعبد اﷲ کا استقبال کیا ، جب وہ نہرو کے سفیر بن کر کشمیر حل کے مشن پر جنرل ایوب خان سے بات چیت کے لئے پاکستان آئے۔ شیخ عبد اﷲ مظفر آباد نہ پہنچیتھے جب دہلی میں نہرو چل بسے۔

خورشید صاحب کو قائد اعظم کی وفات سے بہت دکھ ہوا اور سیاست ترک کردی۔ ایک اخبار دی گارڈین نکالا۔ جسے بعد ازاں بند کر دیا گیا۔ قائد کی ہمشیرہ محترمہ فاطمہ جناح نے انہیں اپنا بیٹا سمجھا۔انھوں نے یہ ثابت کیا کہ کشمیری باکردار، بااعتماد اور قابل بھروسہ ہیں ۔جو اپنے معتمد کے ہر راز اور ہر بات کو امانت سمجھتے ہیں ۔ اس میں کبھی خیانت نہیں کی گئی۔ الا ماشاء اﷲ۔ کے ایچ خورشید نے قائد کا مرتے دم تک ساتھ نبھایا۔ پاکستان قائد اور ایک کشمیری نے مل کر قائم کیا۔ یہ سچ ہر کسی کے مدنظر ہو گا۔ اس لئے کوئی بھی کشمیری اس پر فخر کر سکتا ہے۔ انھوں نے اپنے زاتی مفاد یا مراعات کے لئے ضمیر کا سودا نہ کیا۔ قوم کا استحصال نہ ہونے دیا۔ اپنے نفس کی غلامی نہ کی۔ آزاد کشمیر کے پہلے صدر بنے لیکن سادگی کی زندگی گزارنے سے باز نہ آئے۔ پاکستان قائم کرنے والا اہم کردار،قائداعظم ، بانی پاکستان، گورنر جنرل کا سکریٹری، آزاد کشمیر کا پہلا صدر، فاطمہ جناح کا منہ بولا بیٹا کے ایچ خورشید ایک عام مسافر گاڑی میں سفر کرتا رہا۔ کرایہ کے مکان میں عمر گزار دی۔ کوئی جائیداد، کوٹھیاں، پلاٹ، مربعے، فارم ہاؤس ، بینک بیلنس نہ تھا۔ یہاں تک کہ جب وفات پائی تو اس وقت بھی ایک مسافر بس میں سفر کر رہے تھے۔ جس کو حادثہ پیش آیا۔ وہیں وفات پائی۔ جسد خاکی دفن کرنے کے لئے مظفر آباد لایا گیا۔ آج وہ اسی شہر میں آسودہ خاک ہیں۔ وفات کے وقت آپ کی جیب میں37روپے اور کچھ پیسے تھے۔ یہی ان کا کل اثاثہ تھا۔ بیگم ثریا خورشید لاہور میں رہائش پذیر ہیں۔ انہیں فخر ہے کہ وہ ایک عظیم شخصیت کی شریک حیات رہیں۔ ایسی شخصیت جو پا ک و صاف اور بے داغ رہی۔ کرپشن، دھوکہ، فراڈ، جھوٹ، مکاری، عیاری جیسی زلالتوں سے پاک۔ ان کی سیاست اور حکمرانی خدمت خلق پر مبنی تھی۔ کے ایچ خورشید جیسی ہستیوں کو دنیا ہمیشہ اچھے نام سے یاد رکھے گی۔جن کی گرانقدر خدمات ہیں۔