|
یعنی ایک احمقانہ اور ضدی جاھلیت کا بیانیہ یہ ہے کہ سوال
بھی وہ پوچھیں جو ہمیں وارا کھاتی ہو اور اگر ایسا نہیں کرو گے تو ھم اپنی
تربیت کے مطابق سلوک کریں گے.
مولانا طارق جمیل صاحب کی زھد و تقوی تو ایک بہانہ ٹھرا ورنہ اسی الیکٹرانک
میڈیا کے گماشتوں نے تو اشارہ آبرو پاتے ھی بعض سیاسی رہنماؤں کی خواتین تو
کیا تڑپتی ہوئی جسموں اور الوداعی سانسوں تک کو نہیں چھوڑا تھا .لیکن
مولانا طارق جمیل جو ایک افسوسناک صورتحال میں خود کو پوری طرح سیاسی عمل
کا حصہ بنا چکے ہیں سے سوال کرنا ناقابل تعزیز جرم ٹھرا۔
حامد میر نے فقط اس سوال کو وضاحت طلبی کے ساتھ دھرایا جو مولانا طارق جمیل
نے وزیراعظم عمران خان کی تعریف کرتے ہوئے قدرے جذباتی ہو کر عوام اور
میڈیا پر جھوٹ کا الزام بھی ساتھ گھڑ دیا تھا ۔
یہ یقینًا مولانا طارق جمیل کا بنیادی اور انسانی حق ہے کہ وہ کسی بھی
سیاسی جماعت یا اس کے لیڈر کو پسند بھی کر سکتا ہے اور اس کے بارے میں اپنے
خیالات کا اظھار بھی کرسکتا ہے ۔
وہ کسی بھی لیڈر یا فرد کی خوبیاں بھی گنوا سکتا ہے ۔ اس کے اچھے کاموں کی
تعریف بھی کرسکتا ہے اور اس سے اُمیدیں اور توقعات بھی وابستہ کرسکتا ہے
لیکن اس حوالے سے آپ دوسرے شخص (خواہ وہ سیاسی کارکن ہو یا صحافی ) کا یہ
حق بھی نہیں چھین سکتے کہ وہ سوال اُٹھائے ۔
یہی جرم ایک صحافی حامد میر نے کیا اور پھر وہی وباء پھوٹ پڑی جو گزشتہ ایک
عشرے سے اس بدنصیب وطن کی تہذیب کے شجر کو دیمک کی مانند نہ صرف چاٹ چکا
بلکہ اسے ھر حوالے سے بے برگ و بار بنا کر رکھ دیا ۔
یہی وہ تعفن زدہ لیکن نئے تہذیب کی وباء تھی جو کنٹینر سے پھوٹی تو اردگرد
کھڑے تماش بینوں کی زبان اور ذھن پر ایسا زھر چھڑکا جس سے کسی مخالف کا حرف
ولفظ یا قلم تو درکنار اپنے اجداد کی عزتوں کو بچانا بھی مشکل ٹھرا ۔
رہی بات مولانا طارق جمیل کے حوالے سے تو یقینًا وہ ایک متقی عالم دین ہیں
اور اس حیثیت سے ان کا احترام لازم ہے لیکن جب وہ سیاسی شخصیات کے حوالے سے
تنازعے میں الجھنے اور رائے عامہ کے مخالف سمت میں تیرنے پر کمر بستہ بھی
ہوں تو موجوں کا تلاطم اور متضاد سمت میں بہاو کی طاقت جیسے حقائق کو بھی
نظر انداز کرنا ممکن نہیں
جو مولانا طارق جمیل صاحب کےلئے بھر صورت تھکاوٹ اور پریشانی کا باعث بنتے
رہیں گے.
لیکن سوال یہ ہے کہ آخر اس میں بُرا ماننے کی کیا بات ہے کہ مولانا صاحب نے
ایک الزام لگایا اور ایک صحافی (حامد میر) نے اس حوالے سے وضاحت مانگی
کیونکہ جس پیشے (صحافت ) سے وہ وابستہ ھے اسی پیشے کا ذکر مولانا طارق جمیل
صاحب نے اپنے متنازعہ بیان میں کیا تھا. تاہم مولانا طارق جمیل کی بصیرت سے
ہرگز انکار نہیں کہ اُنھوں نے فوری طور پر اپنے الزام پر نہ صرف معذرت کرلی
بلکہ معافی بھی مانگی جو یقینًا ایک قابل ستائش عمل ہے ، لیکن اس کےبعد حسب
معمول اور حسب توقع سوشل میڈیا کے میدان کار زار میں وہ مجاھدین سربکف ہو
کر اُترے جن کی سیاسی تربیت اور اُٹھان ایک بے بنیاد بیانئیے اور حقائق سے
لاعلم جذباتیت سے تخلیق پائی تھی ۔
میں نہ تو حامد میر کے بارے میں زیادہ جانتا ہوں اور نہ ہی ان سے کسی قریبی
تعلق کا دعویدار ہوں لیکن الیکٹرانک میڈیا کی ھڑبونگ سے بہت پہلے جب پرنٹ
میڈیا ہی صحافت کا مرکز و محور ہوا کرتا تھا تو تب بی وہ ایک انتھک صحافتی
اور قلمی مزدور کی حیثیت سے ایک جانا پہچانا نام بن چکا تھا کہنے کا مطلب
یہ ہے کہ وہ جدید تراش خراش کا سوٹ پہن کر نہ اچانک کسی سکرین پر نمودار ہو
کر " سینئیر تجزیہ کار " بن بیٹھا اور نہ ہی صحافتی اقدار سے ناشناسا ہو کر
ھذیان بکنے لگا بلکہ اس دشت کی سیاحی میں ایک عمر گزاردی اور اسی تجربے نے
کسی حد تک انہیں تہذیب اور شائستگی بھی سکھا دی ۔اس لئے ان کا تعلق باد و
باراں سے بچے اس تھوڑے سے صحافتی لاٹ سے ھے جنہیں صحافی کہنا کم از کم جرم
اور جھوٹ کے زمرے میں نہیں آتا.
ایک پیشہ ور صحافی اپنا سوال ہمیشہ دوسروں کے قول و فعل سے تراشتا ہے لیکن
موجودہ دور کی حرماں نصیب صحافت کا المیّہ دیکھئے کہ ایک بد بخت طبقہ بضد
ہے کہ صحافتی اقدار کو بھی ہماری خواہشات کے دائرے میں ہی مقّید رکھا جائے
اور زبان و قلم کو ھمارے مخالفین کے خلاف گالم گلوچ اور بہتان طرازی جبکہ
ھمارے ممدوح کے حوالے سے صرف مدح و قصیدہ تک محدود رکھا جائے .
تو عرض یہ ہے کہ نہیں جناب ایسا ھرگز نہیں ہوتا کیونکہ صحافت کی اپنی تاریخ
،اقدار اور روایات ہیں اور اسے صرف وہی لوگ نبھا سکتے ہیں جو حرف و لفظ کی
حرمت سے آگاہ بھی ہوں ،صحافت کے مزاج شناس بھی ہوں اور اپنے ضمیر کی لاش کو
کندھا دینے پر تیار بھی نہ ہوں ۔
رہی دوسروں کی خواہشات اور اپنے مفادات کے مطابق صحافت کرنا تو آج کل ایسے
لوگوں کی کمی ہرگز نہیں حتی کہ بعض حضرات تو معمولی سی لطف و کرم پر بھی دو
گز قصیدہ لکھ مارنے کو ھمہ وقت تیار نظر آتے ہیں لیکن اس مکروہ عمل کو کم
از کم صحافت کے نام سے نہیں بلکہ کسی اور نام سے یاد کیا جاتا ہے ۔
وہ جو مشتاق احمد یوسفی نے ایک جگہ تکرار کے ساتھ لکھا ھے کہ اس کے لئے
پشتو میں بہت بُرا لفظ ہے ۔
|