مُردہ خانہ خانے سے

 ہر طرف بے گناہوں معصوموں اور ناکردہ خطاؤں کی بھینٹ چڑھ جانے والوں کی لاشوں کے انبار لگے ہیں ۔۔لوگ مارے ہی نہیں جارہے ۔۔انکی بے حرمتی اور تذلیل کی بھی انتہا ہے۔۔ دائیں بائیں آگے پیچھے لاشیں ہی لاشیں ہیں۔۔۔اور ان لاشوں کے ساتھ ہمارے مردہ ضمیر مردہ احساسات کے لاشے بھی پڑے ہیں ۔۔۔اتنے سارے لوگ مر گئے ہیں؟ ۔۔ ۔ میں نے دُکھ سے سوچا ۔۔۔۔تب کسی نے سرگوشی کی ۔۔۔۔۔۔۔۔جو زندہ ہیں وہ بھی تو مرہی گئے ہیں ۔۔۔۔ میں نے حیرت سے اپنے اردگرد پڑے لاشوں کے ڈھیرکو دیکھا۔۔۔۔یہ آواز انہی لاشوں میں سے کسی کی تھی؟۔۔۔۔ یہ بہت بڑا مردہ خانہ تھا۔۔۔ جہاں غیرت کے نام پر ماری گئی عورتوں ۔۔۔نسل در نسل دشمنیوں کی بھینٹ چڑھ جانے والے جواں مردوں انسانی درندوں کی حرص ہوس اورجنسی خواہشات کی قیمت چکانے والی ننھی منی بچیوں اور معصوم فرشتے جیسے بچوں کی لاشیں ۔۔۔۔مظلوموں بے گناہوں مزدوروں پولیس اوردیگرسکیورٹی فورسز کے جوانوں کے لاشے ۔۔۔ پولیس کے ناکوں اورجعلی پولیس مقابلوں میں مارے جانے والوں کے لاشے اور پھر مذہب کے نام پر ۔۔۔جنونیوں کانشانہ بننے والوں کے لاشے پڑے تھے ۔۔۔مگر جو زندہ ہیں وہ کہاں ہیں؟ ۔۔ یہاں کوئی زندہ انسان کیوں نظر نہیں آرہا ۔۔۔۔ کوئی چلتا پھرتا جیتا جاگتا انسان ۔۔۔ میری پریشانی بڑھ گئی ۔۔۔لاشوں کے ڈھیر ہٹاتے اور راستہ بناتے ہوئے اچانک ایک خیال بجلی کی طرح میرے ذہن میں کوند گیا ۔۔۔۔ کیا میں زندہ ہوں؟۔۔۔۔ مگرمجھے جواب نہ مل سکا۔۔۔ میری پریشانی اور بھی بڑھ گئی ۔۔۔۔تو کیا میں مر چکا ہوں۔۔۔ اور میں بھی ایک لاش ہوں ۔۔۔ہاں تم سب مر چکے ہو ۔۔۔لاشوں کے اندر سے پھر ایک آواز آئی جسکے بعدہر طرف خاموشی چھا گئی تھی ۔۔۔ موت کی سی خاموشی ۔۔۔ مجھے رونا آنے لگا ۔۔۔مگر میں رو نہیں پا رہا تھا۔۔۔میرا حلق خشک ہو گیا تھا ۔۔۔گلے سے آواز نہیں نکل رہی تھی۔۔مجھے افسوس ہو نے لگا تھا ۔۔شایدمیرے اند ر اپنی موت کا ماتم شروع ہو چکا تھا ۔۔۔مجھے توابھی جینا تھا ۔۔۔مجھے زندگی سے کتناپیار تھا ۔۔۔میں ابھی مرنا نہیں چاہتا تھا ۔۔۔۔یہ کب کیوں اور کیسے ہوگیا ۔۔۔۔۔۔ میں اس موت کی بستی میں کیسے آگیا ہوں ۔۔ میں نے تڑپ کر کلائی پر اپنی نبض ٹٹولی ۔۔۔اپنے سینے میں دھڑکن نام کی کوئی شے تلاش کرنے کی کوشش کی مگر بے سود ۔۔۔بے گوروکفن پڑی سب لاشوں کی طرح مجھ میں زندگی کی کوئی رمق نہیں تھی۔۔۔ کوئی احساس تک نہیں تھا ۔۔۔۔ بس میں چلنے پھرنے والا مردہ تھا ۔۔۔۔ مجھے خوشیوں کے دن یاد آنے لگے ۔۔۔میرا پیارا سا گھر ۔۔۔میرے اہل خانہ ۔۔۔۔میرے رفیق ۔۔۔میری دنیا ۔۔۔۔۔میں واپس اسی دنیا میں جانا چاہتا تھا۔۔۔۔ہنسناگانا۔۔۔۔اور بہت سا گھومنا چاہتا تھا میں نے تڑپ کر کلائی پر نبض ٹٹولی ۔۔۔اپنے سینے میں دھڑکن نام کی کوئی شے تلاش کرنے کی کوشش کی مگر بے سود ۔۔۔بے گوروکفن پڑی سب لاشوں کی طرح مجھ میں زندگی کی کوئی رمق نہیں تھی۔۔۔ زندگی کاکوئی احساس نہیں تھا ۔۔۔۔ بس میں چلنے پھرنے والا مردہ تھا ۔۔۔۔ مجھے اپنی خوشیوں کے دن یاد آنے لگے ۔۔۔میرا پیارا سا گھر ۔۔۔میرے اہل خانہ ۔۔۔۔میرے رفیق ۔۔۔میری دنیا ۔۔۔۔۔میں واپس اسی دنیا میں جانا چاہتا تھا۔۔۔۔ہنسناگانا۔۔۔۔اور بہت سا گھومنا چاہتا تھا ۔۔۔لاشوں میں میرا دل مغموم ہو گیا تھا ۔۔۔۔۔ میں زمین پر ڈھے چکا تھا ۔۔۔ میری سسکیاں اور آہیں تھیں کہ تھم نہیں رہی تھیں۔۔۔۔ سب بے گناہ مارے جانے والے لوگ ایسے ہی جینا چاہتے تھے۔۔ میں نے سوچا ۔۔۔سب کو زندگی سے پیار ہوگا۔۔سب کے خواب ۔۔۔اہل خانہ ۔۔۔محبت کے رشتے ہوں گے ۔۔۔مگرسانسیں چھین لینے والوں نے انہیں اپنے حصے کی زندگی بھی جینے نہیں دی ۔۔۔۔روتے سسکتے ۔۔۔پتا نہیں کتنی دیر گزر گئی ۔۔۔میں نے غنودگی میں آنکھیں کھولیں ۔۔۔ ادھر ادھر دیکھنے کی کوشش کی ۔۔۔۔مجھے کچھ نظر نہیں آرہا تھا شایدتاریکی نے سب لاشوں پر ایک پردہ سا تان دیا تھا ۔۔۔تاریکی بھی کتنی مہربان شے ہے ۔۔۔۔۔ہماراکیا کچھ چھپا لیتی ہے ۔۔۔اب مجھے مظلوم بے گناہ اور انکی لاشیں نظر نہیں آرہی تھیں ۔۔۔میں جھوٹ حرص و ہوس لالچ طمع چھینا جھپٹی کی دوڑ میں حصہ لینے ایک بار پھر واپس آچکا تھا ۔۔۔جہاں عدل کے ایوانوں کے بڑے بڑے منصف ،حکومت اور اپوزیشن کے بڑی بڑی کلغیوں والے فنکارسیاستدان اہل دانش وکیل نامی گرامی صحافی ،سرکار کے متکبرافسران اور اپنی پرہیز گاری عشق اور علم پر نازاں بلوائیوں سمیت سبھی موجود تھے ۔۔۔۔ان سب میں مگر کوئی احساس اور ضمیر رکھنے والاانسان نظر نہیں آرہا تھا۔۔۔۔انسانیت کی وفات پر مجھ سمیت کوئی نوحہ کناں بھی باقی نہ بچا تھا