صوبہ بلوچستان میں بدامنی کے محرکات

(Amjad Chohdury, )

کوئٹہ کے نواحی علاقہ کناری روڈ پر نامعلوم مسلح افراد کی پولیس وین پر فائرنگ سے دو پولیس کانسٹیبل جاں بحق اور دو زخمی ہو گئے۔ ایک روز قبل کوئٹہ میں ہی عالمو چوک پر ایف سی کی گاڑی کے قریب کار بم دھماکے کے نتیجے میں ایف سی کے دو اہلکاراور دو راہگیر جاں بحق جبکہ عورتوں اور بچوں سمیت 40 افراد زخمی ہوگئے تھے۔ پولیس کے مطابق یہ دھماکا ریموٹ کنٹرول ڈیوائس کے ذریعے کیا گیا۔ ایسے ہی بیسیوں واقعات روزانہ صوبہ بلوچستان کے مختلف حصوں میں رونما ہوتے ہیں جس سے یہاں بدامنی کی صورتحال کا اندازہ لگایا جاسکتا ہے اور اس حقیقت کا بھی پتہ چلتا ہے کہ اس تخریب کاری کے پس پردہ ایک بہت ہی منظم قوتیں کارفرما ہیں جو مقامی کرداروں کے ذریعے یہاں دہشت گردی کو ہوادینے میں مصروف ہیں۔یہ قوتیں ہرگز نہیں چاہتیں کہ پاکستان کے اس اہم ترین صوبے میں امن قائم ہو۔ اگر غور کیا جائے تویہ عناصربلوچستان میں ایک نام نہاد شورش برپا کرکے پاکستان کی معاشی اور تجارتی خوشحالی پر چھری پھیرنے کی کوششوں میں مصروف ہیں۔مقامی کٹھ پتلی سرداروں کے ذریعے صوبے کے عوام میں احساس محرومی جیسے جذبات پیدا کرکے انہیں وفاق کے خلاف بڑھکانے کی کوششوں کے ساتھ قانون نافذ کرنے والے اداروں کے خلاف پراپیگنڈہ کیا جارہا ہے۔ بلوچستان کی اسٹریٹجک اہمیت کی وجہ سے یہاں نو ممالک کی خفیہ ایجنسیاں منفی سرگرمیوں میں ملوث پائی گئی ہیں ۔ افسوس ناک بات یہ ہے کہ بلوچستان کے وہ لوگ جو وفاقی اور صوبائی حکومتوں میں اقتدار کے مزے لوٹ چکے ہیں اور متعدد مرتبہ بلوچی عوام کے لئے مختص خطیر رقوم کو ہضم کرچکے ہیں، ان ریشہ دوانیوں میں مرکزی کردار ادا کررہے ہیں۔صوبہ بلوچستان میں حقوق کے نام سے شروع کی جانے والی تخریب کاری میں شدت اس وقت دیکھی گئی جب ایک معاہدے کے تحت چین نے گوادر کے ساحل پر بندرگاہ کی تعمیر کا آغاز کیا۔ قدرتی گہرے سمندر کے ساحل پر بندرگاہ کی تعمیریوں تو عالمی طاقتوں کے لئے ناقابل قبول تھی مگر بھارت نے اس کی تعمیر کو رکوانے کی لئے فوری طور پر ریشہ دوانیوں کا لا متناہی سلسلہ شروع کردیا۔حتیٰ کہ مئی2008ءکوبھارتی پارلیمنٹ میںایک قرارداد پاس کی گئی جس میں گوادر کو بھارت کی سلامتی کیلئے خطرناک قرار دیتے ہوئے اس کے تدارک کا فیصلہ کیا گیا۔یہ تدارک مختلف طرح کے حملوں کی صورت میں تھا۔ مثلاً بلوچستان میں مسلح مداخلت آباد کاروں کا قتل‘ علیحدگی پسندوں کی طرف سے اہم سرکاری و دفاعی تنصیبات پر حملے‘ صوبہ سرحد و قبائلی علاقوں میں دہشت گردوں کی عسکری و مالی مدد اور پاکستان کے طول و عرض میں دھماکوں‘ خودکش حملوں کو فروغ دیا گیا۔ اسی طرح امریکہ کی بھی خواہش تھی کہ چین کی معاشی و دفاعی ’لائف لائن“ گوادر تک دراز نہ ہوسکے۔ذیل میں بلوچستان کی ان خوبیوں کا ذکرکیا جارہا ہے جن کی بدولت پاکستان کا یہ صوبہ عالمی سازشوں کا مرکز بن چکا ہے۔ بلوچستان کواس کے محل وقوع، گوادر پورٹ کو مستقبل میں تجارتی سرگرمیوں کے بڑے مرکزہونے، ایران گیس لائن منصوبے اوروہاں موجود معدنیات اور قدرتی وسائل کے خزانوں کی بدولت ایک خاص اسٹریٹجک مقام حاصل ہے اور مستقبل میں پاکستان کی ترقی اور خوشحالی گوادر پورٹ کے راستے یہاں ہونے والی معاشی و تجارتی سرگرمیوں سے وابستہ ہوگی۔ بلوچستان کے محل وقوع کی ایک اور اہم بات یہ ہے کہ اس کی سرحدیں پاکستان کے باقی تمام صوبوں سے بھی ملتی ہیں جبکہ بین الاقومی لحاظ سے مغرب میں اس کی سرحد ایران سے خلیج فارس کے عین سامنے اور شمال میں اس کی سرحد جنوبی افغانستان سے ملتی ہے۔ اگر قدرتی وسائل اور معدنیات کے لحاظ سے دیکھا جائے تو صوبہ بلوچستان پاکستان کا سب سے امیر ترین صوبہ ہے۔ یہاں گیس ، لوہے، سونے، کاپر اور کوئلے کے بہت بڑے ذخائر موجود ہیں لیکن بدقسمتی سے مختلف قسم کی رکاوٹوں اور وجوہات کی بدولت ان تک مکمل رسائی ممکن نہیں ہورہی۔ان رکاوٹوں میں غیرملکی ایجنسیوں کی تخریب کاری، عدم تحفظ اور غیریقینی صورتحال قابل ذکر ہیں۔ پاکستان کی زیادہ تر ساحلی پٹی بھی بلوچستان میں ہے جس کی سمندر کے ساتھ گہرائی ایک ہزار میٹر سے تین ہزار میٹر تک ہے اور اس طرح یہ نہ صرف بڑے تجارتی بحری جہازوں بلکہ ہنگامی حالات میں پاک بحریہ کے جہازوں کی نقل و حمل کے لئے بھی سود مند ہے۔ اس طرح دفاعی لحاظ سے بھی اس کی اہمیت کسی طور کم نہیں۔یہاں بیک وقت 26جہاز لنگر اندازہوسکیں گے۔ گوادر پورٹ کی تعمیر کے بارے میں پاک چین اشتراک دنیا بھر کی آنکھوں میں کھٹک رہا ہے ۔ اس میں کوئی شک نہیں کہ گوادر پورٹ کی تعمیر میں چین نے بھرپور تعاون کیا ہے اور اس کا فائدہ بھی دونوں ممالک کو پہنچے گا۔چین کی بڑی تجارتی سرگرمیاں اس کی مشرقی ساحلی پٹی کے ساتھ ہورہی ہیں۔ صوبہ سنکیانگ جس کی سرحدیں پاکستان اوروسط ایشیائی ریاستوں سے ملتی ہیں،اس کے داراحکومت ارومکی میں چین نے قزاقستان سے تیل کی پائپ لائن بچھانے کے ساتھ ساتھ وہاں نیشنل آئل ریفائنری لگائی ہے۔گزشتہ پندرہ سال یہاں کی تجارتی سرگرمیوں میں بھی بے پناہ اضافہ ہوا ہے۔ چونکہ اورمکی چین کی مشرقی بندرگاہوںاور گوادر سے تقریبا یکساں فاصلے پر واقع ہے۔ تاہم چین کی یہ مشرقی بندرگاہیں چونکہ بحر الکاہل کے ذریعے براہ راست امریکہ، یورپ اور مشرق وسطیٰ کے ممالک تک رسائی حاصل کرتی ہیں لیکن یہاں سے چینی جہازوں کو خلیج عدن تک پہنچنے کے لئے بحر ہند کے ساتھ ساتھ اسٹریٹس آف ملاکہ کے راستے جانا پڑتا ہے۔ جہاں پہنچنے کے لئے انہیںتقریبا پانچ ہزار میل کا طویل سفر طے کرنا پڑتا ہے۔ مگر گوادر سے خلیج عدن صرف گیارہ سو میل کے فاصلے پر واقع ہے۔ چین ، قزاقستان سے بذریعہ ریل بھی جڑا ہے۔یہ ریلوے لنک بھی چین کے صوبہ سینکیانگ کے دار لاحکومت ارومکی سے قزاقستان کے سابق دارالحکومت الماتے کے درمیان ہے۔ جس کی سرحد کرغستان سے بھی ملتی ہیں۔ اس طرح چین اور پاکستان کے درمیان شاہراہ قراقرم کے ساتھ ساتھ حویلیاں تک ریلوے لائن بچھانے کے ایک منصوبے پر بھی دستخط ہوچکے ہیں۔ یہاں سے گوادر تک براہ راست ریلوے لائن بچھانے کا منصوبہ بھی بنایا گیا ہے۔ اس طرح مستقبل میں چین کی تجارت اس کے مغربی حصے میں ہوگی اور وہاں سے گوادر کے ذریعے اس کے سامان کی ترسیل ہوگی۔ وسط ایشیائی ممالک بھی گوادر کے راستے کا بھرپور فائدہ اٹھا سکیں گے۔ بلوچستان میںریکوڈک ضلع چاغی کا پسماندہ ترین علاقہ ہے۔ ایک سروے کے مطابق دنیا کے دوسرے بڑے ذخائر پاکستان کے ان دور دراز اور پسماندہ ترین علاقوں میں موجود ہیں جہاں سے سونا نکالنے کا کام 2006ءسے جاری ہے۔ دنیا کے سب سے بڑے سونے اور تانبے کے ذخائر پاکستان میں موجود ہیں جن کا ایک حصہ بیرک گولڈ نے خرید لیا ہے۔ان قدرتی وسائل کے علاوہ بلوچستان کا محل وقوع بھی پاکستان کے لئے اسٹریٹجک اہمیت کا حامل ہے۔ اس کی سرحدیں نہ صرف پاکستان کے چاروں صوبوں سے ملتی ہیں بلکہ خلیج اور وسطی ایشیائی ریاستوں اور افغانستان سے قربت اس کی اہمیت کو اور بھی بڑھا دیتی ہے۔

صوبہ بلوچستان کی اسی اہمیت کے پیش نظر عالمی طاقتوں خاص طور پر بھارت نے یہاں ریشہ دوانیوں کا بازار گرم کررکھا ہے۔ چندمقامی عناصر اسی کے اشاروں پر ایک قسم کی بغاوت کو ہوا دے رہے ہیں۔ افغانستان کی سرزمین پر قائم بھارتی قونصل خانے دراصل دہشت گردوں کی فیکٹریاں ہیں۔ یہ فیکٹریاں مقامی سرداروں کے ذریعے بلوچستان میں اس قدر مصروف عمل ہیں کہ مقامی سویلین انتظامیہ ان پر قابوپانے میں ناکام نظر آتی ہے۔ صرف فرنٹیر کانسٹیبلری اپنے فرائض بڑی مستعدی سے انجام دے رہی ہے۔ اس کے افسروں اور جوانوں کو بیک وقت دو محاذوں پر لڑنا پڑ رہا ہے۔اس کے جوان ایک طرف بارڈر پر دراندازی کو روکنے میں مصروف ہیں تو دوسری طرف شہری علاقوں میں امن عامہ قائم کرنے کی تگ و دو کررہے ہیں۔ ایف سی جس انداز سے دشمن کی مکروہ سرگرمیوں کا مقابلہ کررہی ہے، وطن عزیز کے دشمن اسے اپنے عزائم کی تکمیل میں سب سے بڑی رکاوٹ خیال کررہے ہیں۔ یہی وجہ ہے کہ مختلف حیلوں بہانوں سے اسے بدنام کرنے کی سرتوڑ کوششیں کی جارہی ہیں۔ عوام کے حقوق کا علمبردار ہونے کا دعویٰ کرنے والے سردار غیرملکی ایجنسیوں کے ذریعے اپنے ہی شہریوں کے گلے کاٹنے میں مصروف ہیں ، جس کا الزام سوچے سمجھے منصوبے کے تحت ایف سی پر لگادیا جاتا ہے اور اس طرح عوام اور فوج کو لڑانے کی مذموم کوشش کی جارہی ہے۔اس پس منظر میں ضرورت اس امرکی ہے کہ دشمن کی ان ریشہ دوانیوں کا ادراک کرتے ہوئے اپنی صفوں میں اتحاد برقرار رکھا جائے اور تمام غلط فہمیاں اور مسائل مل بیٹھ کر حل کئے جائیں بصورت دیگر الجھاﺅ اور میں نہ مانوں کی رٹ دراصل دشمن کی سازشوں کو کامیاب کرنے اور پاکستان کے معاشی قتل کے مترادف ہوگا۔

< PREVIOUS زرداری صاحب ! بزرگان دین کےنام پر تو فراڈ نہ کریں NEXT > ہم کرائے پہ دستیاب ہیں