سپریم کورٹ میں انکشاف ہوا کہ
کراچی پولیس کے چار سو افسران سنگین جرائم میں ملوث ہیں ،۔ایم آئی ٹی رپورٹ
کے مطابق 400افسران سنگین جرائم میں ملوث ہیں ، قابل ذکر بات یہ ہے کہ آئی
جی سندھ کو یہ رپورٹ سپریم کورٹ کی جانب سے فراہم کی گئی جس کا مطلب یہ ہے
کہ سندھ پولیس اپنی صفوں میں موجود کالی بھیڑ سے دانستہ ناواقف ہے۔یہ
افسران قتل ، ڈکیتی اور دیگر جرائم میں ملوث ہیں اور ان کی چالان بھی
عدالتوں میں پیش کئے جاچکے ہیں لیکن حیرت ناک بات یہ ہے کہ آئی جی سندھ ان
پولیس افسران کی تعیناتی سے لاعلمی کا اظہار کررہے ہیں۔ ایک اور حیرت خیز
انکشاف ایڈیشنل چیف سیکرٹری داخلہ وسیم احمد نے کیا تھا کہ محکمہ داخلہ کے
پاس 1985سے کی گئی جوڈیشنل انکوئریز کا ریکارڈ موجود نہیں صرف پندرہ دن کا
ریکارڈز مل سکا ہے۔کراچی جل رہا ہے اور اُس کے محافظین سوائے مراعات میں
اضافے کے کوئی کارکردگی دکھانے کیلئے سنجیدہ نظر نہیں آتے ۔رینجرز اور
پولیس کی کارکردگی صفر اور ان کے بجٹ میں اضافہ سو فیصد ہے۔بجٹ سال
2008-09میں پولیس کا بجٹ 20ارب روپے تھا جو کہ سال 2002-13میں بڑھ بڑھ کر
39ارب روپے سے زائد ہوچکا ہے۔رینجرز کو سال 2008-09میں 51کروڑ کے فنڈ ملے
جوکہ سال 2012-13میں بڑھ کر ایک ارب29کروڑ ہوگئے ۔ اس کے علاوہ پولیس کیلئے
2009-10میں 26ارب روپے ،2010-11میں 31ارب روپے ،2011-12 میں 38ارب روپے کا
بجٹ مختص کیا گیا جبکہ رینجرز کے لئے 2009-10میں 97کروڑ روپے ، 2010-11 میں
ایک ارب 19کروڑ روپے ، 2011-12میں ایک ارب تیرہ کروڑ روپے رکھے گئے۔
حساس اداروں کی جانب سے رپورٹ کے مطابق سندھ پولیس میں جرائم پیشہ عناصر
موجود ہیں جس پر سی پی ایل سی نے 02اکتوبر 2019کو لیٹر نمبر CCPO/Discp
(PC) 87968-72میں دو ہزار کانسٹیبلز کے ریکارڈ میں سے چھ سو مشکوک افراد کے
ریکارڈکو اپنی رپورٹ کے ساتھ آئی جی سندھ کو بھیج دیا جن کی ہدایت پر ڈی
آئی جی ساؤتھ غلام نبی میمن کو ان جرائم پیشہ کانسٹیبلز کے خلاف تحقیقات کا
حکم دیا گیاتھا لیکن اُس تحقیقات کا کیا کیا نتیجہ نکلا اس سے آج تک عوام
بے خبر ہیں ۔ حالاں کہ اس وقت اسلام آباد میں لرزاں طاری ہوگیا تھا کہ
خطرناک جرائم میں ملوث افراد شہداد پور ، اور کراچی میں ٹریننگ حاصل کر رہے
ہیں ۔ سی پی ایل سی کے اُس وقت کے چیف شرف الدین میمن نے رپورٹ کی تصدیق کی
تھی۔ تاہم اس حوالے سے اس موقف کو بھی دوہرایا تھا کہ ممکن ہے کہ اس فہرست
میں کچھ ایسے افراد بھی شامل ہوگئے ہوں جو نام و ولدیت کی مماثلت کی وجہ سے
بے گناہ ہوں تاہم اس سلسلے میں حتمی بات تحقیقات کے بعد ہی کہی جا سکتی ہے
۔ لیکن سندھ حکومت نے ابھی تک اس اہم معاملے کو زیر التوا رکھا ہوا ہے۔
ایڈیشنل آئی جی کراچی اقبال محمود ، گارڈن پولیس ہیڈ کواٹر میں دربار سے
دوران خطاب انکشاف کیا کہ نارتھ ناظم آباد کے ایس پی لطیف صدیقی نے ٹرینگ
کے بعد سے اب تک اسلحے کو ہاتھ نہیں لگایا اور اگر کبھی جرائم پیشہ افراد
سے سامنا ہو جائے تو وہ ملزمان سے مقابلہ کرنے کے بجائے انھیں پتھر مار کر
بھگائیں گے۔ اس موقع پر ڈی آئی جی سی آئی ڈی منظور مغل ، ضلع کے ڈی آئی جیز
کے علاوہ ڈی آئی جی ایڈمن عمران یعقب منہاس بھی موجود تھے۔ایڈیشنل آئی جی
کراچی اقبال محمود کا کہنا تھا کہ اگر پولیس اہلکار زخمی ہوجائے تو ٹاؤن کے
ایس پیز اس لئے جانے سے کتراتے ہیں کہ کہیں انھیں عیادت کے دوران پیسے نہ
دینے پڑ جائیں ۔ کرائم سین پر دیر سے پہنچ کرافسران کے منہ تکتے ہیں اور
جائے وقوع دیر سے پہنچنے کی عادت کی وجہ سے شواہد ہی مٹ جاتے ہیں اورتفتیشی
عمل میں کوئی پیش رفت نہیں ہوتی۔ایس او ایچ سیاسی شخصیات اور بیوروکریسی سے
سفارشی فون کراتے ہیں ۔ افسران وردی کے بجائے کاٹن کے کپڑوں میں علاقوں میں
گھومتے ہیں اور جرائم کی بیخ کنی کے بجائے انھیں منشیات اور جرائم کے اڈے
چلانے سے فرصت نہیں۔ جواری سر عام پولیس کو زد و کوب کرتے ہیں اور ایس ایچ
اوز کی ہمت نہیں ہوتی کہ وہ جواری کو پکڑ کر بند کریں ۔ ایڈیشنل آئی جی
کراچی اقبال محمود کے یہ انکشافات لمحہ فکریہ ہیں بقول خود ان کے ایسا نہ
ہو جرائم پیشہ عناصر تھانوں میں گھس کر پولیس کو ماریں اور شہر میں پولیس
کی رٹ ختم ہوجائے۔ پولیس کی یہ کارکردگی خود ان کے اعلی ترین افسر کے جانب
سے کی گئی ہے ۔ لیکن پولیس کا یہ نظام کوئی آج کا بگاڑ کا نتیجہ نہیں ہے
۔کراچی جلے گا نہیں تو کیوں نہیں جلے گا ۔
کراچی میں پچھلی بار چیف جسٹس آف پاکستان کی سربراہی میں پانچ رکنی بینچ کے
ساتھ کراچی بد امنی کیس کی سماعت ہوئی تودوران سماعت ایڈوکیٹ جنرل سندھ
کیجانب سے پیش کردہ رپورٹ پر سپریم کورٹ نے مکمل عدم اطمینان کا اظہار کرتے
ہوئے آئی جی سندھ کو سرزنش کی کہ بغیر اسکوڈ کے چار دن کراچی میں گھوم کر
دکھائیں، اگر ڈر لگتا ہے تو عہدہ چھوڑ دیں۔ایڈوکیٹ جنرل نے بتایاتھا کہ
80پولیس اہلکاروں کے ساتھ1900افراد اس سال قتل کئے جاچکے ہیں۔عدالت نے
سیکورٹی اداروں کو شدید تنقید کا نشانہ بنایا کہ کیا ایجنسیاں صرف محفلیں
سجانے کا کام کرتی ہیں۔بلاول ہاؤس کی سیکورٹی کیلئے پچاس فٹ بلند حفاظتی
دیوار اور پورے علاقے کو نو گو ایریا بنانے پر بھی سپریم کورٹ نے برہمی کا
اظہار کیا تھاکہ صدر زرداری بلاول ہاؤس جانے والی سڑک خرید کیوں نہیں
لیتے۔عدلیہ کیجانب سے انتظامیہ کی کارکردگی پر برہمی کا اندازہ اس بات سے
بھی لگایا جاسکتا ہے کہ جب ایڈوکیٹ جنرل سندھ نے کہا کہ پولیس اہلکار بھی
شہید ہوئے ہیں تو عدالت نے ریمارکس دئیے کہ زیادہ تر پولیس اہلکار ذاتی
دشمنی میں ہلاک ہوئے اور کوئی بڑا افسر شہید نہیں ہوا صرف غریب اہلکار ہی
ہلاک ہوا۔
کراچی کا سب سے بڑا ہولناک انکشاف کراچی سیکورٹی کے حوالے سے ایک سرکاری
رپورٹ میں کیا گیا کہ دہشت گردی کا عفریت کراچی پر پوری طرح چھایا ہوا ہے
اور کراچی کے بعض علاقے"وزیرستان"بن گئے ہیں، جبکہ ایک غیر ملکی رپورٹ جو
حکومت پاکستان کے پاس ریکارڈ میں یہ ہوش ربا انکشاف کیا گیا کہ
ـ"پاکستانوں"کے پاس دو کروڑ مہلک ترین ہتھیار ہیں اور جدید ترین ہتھیار
رکھنے والے 178ملکوں کی فہرست میں پاکستان کا ساتواں نمبر ہے۔اوسطا
20بیگناہ شہری ہلاک ہوتے ہیں۔وزرات داخلہ کی رپورٹ کے مطابق کراچی میں بھتہ
خور، اسلحہ مافیا ،قبضہ گروپ ، لسانی ، مذہبی ، گروہی اور فرقہ واریت میں
ملوث گروپوں سمیت49کالعدم شدت پسند تنظیمیں بے گناہوں کا خون بہا رہی ہیں
اور شہریوں کا کوئی غمگسار اور پُرسان حال نہیں۔
ادارے،سیاسی جماعتیں اور ارباب اختیار سب جانتے ہیں ، سمجھتے ہیں، لیکن
کراچی کے حالات پر کسی نے بھی سنجیدگی اختیار نہیں کی ۔ پولیس رینجرز سے
لیکر حکومتی ایوانوں تک صرف کراچی پر پوائنٹ اسکورنگ کی جاتی ہے ، کراچی آج
دہشت گردی کی آگ میں جل رہا لیکن اس آگ کو بجھانے والا کوئی نہیں ہے۔ آگ
میں تیل ڈال کر ہوا دینے والے ، زخموں پرمرہم رکھنے والے کم اور کفن پہنانے
والے بہت ہیں۔گولیاں چلانے والوں کو روکنے والے کم اور اسلحہ لائسنس جاری
کرنیوالے بہت ہیں۔کراچی کا غم بانٹنے والے کم ، کراچی پر دکھاوا کرنے والے
بہت ہیں۔آج کراچی جل رہا ہے اور اس کا کوئی غمگسار نہیں ہے۔یاد رکھو ،
کراچی سے مت کھیلو ، سب ٹھاٹھ پڑا رہ جائے گا ۔۔۔اس آگ سے ایک کا نہیں سب
کا گھر جلے گا۔صرف راکھ ہی مقدر بنے گی ۔ |