استعفوں کے باوجود گوشوارے جمع،تبدیلی یا۔۔۔۔؟

وزیراعظم نوازشریف نے تحریک انصاف سے مذاکرات دوبارہ شروع کرنے کیلئے وزیرخزانہ اسحاق ڈار کو خصوصی ہدایات جاری کی ہیں۔سیاسی جرگے کے سربراہ اور امیر جماعت اسلامی سراج الحق کی درخواست پر تحریک انصاف سے مذاکرات دوبارہ بحال کرنے کیلئے وزیرخزانہ اسحاق ڈار کو خصوصی ہدایا ت دیتے ہوئے کہا گیاہے کہ تحریک انصاف کی قیادت سے جلداز جلد رابطہ کیا جائے اور ان کی مذاکراتی ٹیم سے بامقصد اور جامع مذاکرات کیے جائیں تاکہ اس مسئلے کو آئین اور قانون کے مطابق حل کیا جاسکے۔ تحریک انصاف سے مذاکرات سپریم جوڈیشل کمیشن کی تشکیل ،الیکشن کمیشن کی ازسر نوتشکیل اور انتخابی اصلاحات کے حوالے سے کیے جائیں گے اور پہلے مرحلے میں براہ راست مذاکرات میں جوڈیشل کمیشن کی تشکیل اور اس کی تحقیقاتی مدت کا تعین کیا جائے گا ،حکومت کی جانب سے تحریک انصاف کو آگاہ کیا جائے گا کہ حکومت جوڈیشل کمیشن کی تحقیقات کے لیے ایک ماہ وقت مقرر کرنے کے لیے تیار ہے تاہم یہ قانونی معاملہ ہے ،اس حوالے سے حکومت سپریم کورٹ کے چیف جسٹس کو ازسر نو ایک درخواست ارسال کرے گی ،جس میں ان سے گذارش کی جائے گی کہ چیف جسٹس جلد از جلد انتخابات 2013میں ہونے والی مبینہ دھاندلی کی تحقیقات کے لیے تین ججوں پر مشتمل ایک کمیشن تشکیل دیں جو ایک ماہ میں اس معاملے کی تحقیقات مکمل کرکے اپنی رپورٹ اور سفارشات مرتب کرے ،اب کمیشن کی تشکیل اور مدت کا تعین کا حتمی فیصلہ عدالت خود کرے گی۔پاکستان تحریک انصاف کے چیئرمین عمران خان اوردیگر مستعفی ممبران قومی اسمبلی کی رکنیت کے مستقبل کا فیصلہ سپیکر قومی اسمبلی کے ہاتھ میں ہے۔ قومی اسمبلی رولز اور آئین کے آرٹیکل64 کے تحت کوئی بھی ممبران ایوان کو بغیر بتائے غیر حاضر نہیں رہ سکتااور 40دن سے زائد بغیر اطلاع غیر حاضری پر اس رکن کو ایوان کی قرارداد کی منظوری سے رکنیت سے محروم کیا جا سکتا ہے۔ عمران خان کو 40 دن سے زائد ہوگئے ہیں کہ وہ قومی اسمبلی کے اجلاس میں شریک نہیں ہوئی جبکہ ان کے دیگر ارکان کو33 دن ہوگئے ہیں کہ وہ ایوان سے غیر حاضر ہیں اور چھٹی کی کوئی درخواست بھی نہیں دی۔17 نومبر کو قومی اسمبلی کا اجلاس اس حوالے سے اہمیت کا حامل ہے جبکہ قومی اسمبلی سیکرٹریٹ کی طرف سے پی ٹی آئی کے ارکان کو اس مسلسل غیر حاضری کے حوالے سے یاددہانی کے خط لکھنے پر بھی غور کیا جارہا ہے۔ تحریک انصاف کے چیئرمین اور دیگر غیر حاضر ممبران اسمبلی کی قسمت کا فیصلہ سپیکر قومی اسمبلی سردار ایاز صادق کے ہاتھ میں ہے۔انہیں نا اہل قرار دے یا نہ دے اب بال سپیکر کے کورٹ میں ہے۔ان ممبران کو غیر حاضرہوئے 33 دن ہو چکے ہیں۔ پی ٹی آئی کے چیئرمین عمران خان کو ایوان سے غیر حاضر ہوئے 40 جبکہ دوسرے ممبران33 ہو گئے اور17 نومبر کوآنے والے قومی اسمبلی کااجلاس نہایت اہمیت کا حامل ہے۔ قومی ا سمبلی کے رولز نمبر44 کے تحت اگر کوئی رکن اسمبلی کی اجازت کے بغیر اس کے اجلاسوں سے متواتر چالیس دن تک غیر حاضر رہے تو سپیکر اس امر کو اسمبلی کے علم میں لائے گا اور اس پر کوئی رکن تحریک پیش کرسکتا ہے۔اس طرح غیر حاضر رہنے والے رکن کی نشست آئین کے آرٹیکل64 کی شق دو کے تحت خالی قرار دیدی جائے گی۔شق2 کے ذیلی قاعدہ (1) کے تحت پیش کردہ تحریک ایوان موخریا مسترد کر سکتا ہے۔اگر تحریک منظور کرلی جاتی ہے تو رکن کی نشست خالی قرار دی جائے گی۔اگرنشست خالی قرار دیدی جائے تو سیکرٹریٹ گزٹ میں شائع کرنے کے لئے ایک نقل الیکشن کمیشن کو ارسال کرے گا۔تحریک انصاف کے سربراہ عمران خان،شاہ محمود قریشی ،اسد عمر ،عارف علوی اور قومی و صوبائی اسمبلیوں کے دیگر اراکین نے استعفے دینے کے باوجود بطور ایم این اے اور ایم پی اے الیکشن کمیشن کو اثاثہ جات کی تفصیلات جمع کرا دی ہیں جس سے یہ سوال پیدا ہوتا ہے کہ وہ مستعفی ہونا بھی چاہتے ہیں یا نہیں کیونکہ قانون کے مطابق تو وہ یہ اثاثے جمع کرانے کے پابند نہ تھے۔ عوامی نمائندگی کے قانون مجریہ 1976 کے سیکشن42-A مستعفی رکن اسمبلی کو اثاثوں کی تفصیلات جمع کروانے کا پابند نہیں کرتا۔تحریک انصاف کے سربراہ عمران خان نے14 اگست کو آزادی مارچ کے بعد قومی و صوبائی اسمبلیوں سے مستعفی ہونے کا اعلان کیا اور ان کی جماعت کے اراکین نے مشترکہ طور پر22 اگست کو قومی اسمبلی میں جبکہ27 اگست کو پنجاب اسمبلی میں اپنے استعفے جمع کروا دیئے اور دونوں اسمبلیوں کے سپیکروں اور جماعت اسلامی کی کوششوں کے باوجود تاحال تحریک انصاف کے ان اراکین نے اپنے استعفے واپس نہیں لئے اور ان کا اصرار ہے کہ استعفے قبول کئے جائیں لیکن اسی کے ساتھ عمران خان ،شاہ محمود قریشی ،اسد عمر ،عارف علوی اور پی ٹی آئی کے دیگر اراکین قومی و صوبائی اسمبلی نے استعفے دینے کے بعد ستمبر کے دوسرے عشرے میں بطور ایم این اے اور ایم پی اے اپنے اثاثوں کی تفصیلات الیکشن کمیشن کو جمع کروائیں جو کہ ان کے مستعفی ہونے کے اعلان اور استعفے جمع کروانے کے اقدام سے متصادم ہے۔عوامی نمائندگی کے قانون مجریہ 1976 کے سیکشن43-A کے تحت قومی و صوبائی اسمبلیوں کے ممبران ہر سال 30 ستمبر تک گزشتہ مالی سال کے اثاثہ جات اور ذمہ داریوں کے گوشوارے جمع کروانے کے پابند ہیں۔مذکورہ قانون کے تحت صرف اراکین اسمبلی ہی الیکشن کمیشن کو گوشوارے جمع کروانے کے پابندہوتے ہیں۔عام آدمی یا مستعفی ہونے والے اراکین کے متعلق یہ قانون کچھ بیان نہیں کرتا اور عمران خان سمیت تحریک انصاف کی طرف سے گوشوارے جمع کروانے والے اراکین نے مستعفی کی بجائے ریگولر ایم این اے اور ایم پی ایز کی حیثیت سے گوشواروں کی تفصیلات جمع کروائیں۔ الیکشن کمیشن کی طرف سے گزشتہ روز جاری ہونے والی تفصیلات کے مطابق قومی اسمبلی سے صرف تین اراکین نے اپنے اثاثوں کی تفصیلات جمع کروائیں اور ان تینوں کا تعلق تحریک انصاف سے ہے۔ان میں پشاور کے ساجد نواز کوہاٹ کے شہریار آفریدی اور ایبٹ آباد کے ڈاکٹر محمد اظہر خان جدون شامل ہیں۔اسی طرح پنجاب اسمبلی سے اب تک گوشوارے جمع نہ کروانے والے کل 8 میں سے5 ارکان تحریک انصاف سے تعلق رکھتے ہیں۔ان میں راولپنڈی سے ملک تیمور مسعود،میانوالی سے ڈاکٹر صلاح الدین،لاہور سے میاں محمد اسلم اقبال،ساہیوال سے وحید اصغر ڈوگر اور لیہ سے عبدالمجید خان نیازی کے نام شامل ہیں جبکہ گوشوارے جمع نہ کروانے والے پنجاب کے دیگر تین ایم پی ایز کا تعلق حکمران جماعت سے ہے۔ الیکشن کمیشن کے ترجمان کا کہنا تھا کہ الیکشن کمیشن نے مالی سال2013-14 کے گوشوارے جمع کروانے کے لئے اراکین اسمبلی کو پہلا نوٹس4 جولائی کو جاری کیا۔جس میں مطلع کیاگیا کہ تمام اراکین قومی و صوبائی اسمبلی30 ستمبر تک یکم جولائی2013 سے30 جون2014 ء تک کے اثاثہ جات اور ذمہ داری کی تفصیلات الیکشن کمیشن کو جمع کروائیں جس کے جواب میں پی ٹی آئی کی قیادت سمیت پارٹی کے دیگر اراکین نے ستمبر کے دوران حتمی تاریخ سے قبل ہی گوشوارے جمع کروا دیئے تھے۔ترجمان کا مزید کہنا تھا کہ عوامی نمائندگی کا قانون مستعفی ہونے والے ممبران سے اثاثہ جات کی تفصیلات طلب کرنے کے حوالے سے خاموش ہے۔