شاہین اختر
اگرچہ اب یہ بات کوئی ڈھکا چھپا راز نہیں کہ مشرقی پاکستان توڑنے کی سازش
بھارت کی باقاعدہ منصوبہ بندی کا حصہ تھی۔ اندرا گاندھی نے اقتدار میں آنے
کے بعد بھارتی انٹیلی جنس ایجنسی ’’را‘‘ قائم کی جس کو پہلا ٹاسک مشرقی
پاکستان کو علیحدہ کرنے کا سونپا گیا جس کا نام تھا ’’آپریشن بنگلہ دیش‘‘۔
آج بھی بھارت پاکستان دشمنی میں بلوچستان میں براستہ افغانستان دہشت گردی
کرا رہا ہے اور خود بھارتی فوج کے ایک آرمی چیف اعتراف کرچکے ہیں کہ بھارتی
فوج نے پاکستان میں آپریشنز کے لئے ایک یونٹ تشکیل دیا تھا۔ اس وقت بھی
بنگلہ دیش میں پاکستانی فوج کا ساتھ دینے والے بنگلہ دیشی قومی رہنماؤں کو
پھانسیاں دی جا رہی ہیں۔ پہلے بھی بنگلہ دیش کے قیا م کے لئے بھارتی میڈیا
نے زبردست پراپیگنڈا مہم چلائی اور اب بھی بنگلہ دیش میں بھارت نواز عوامی
لیگ بھارتیوں کے اشارے پر سب کچھ کررہی ہے۔ اب یہ بات ثابت ہو چکی ہے کہ
عوامی لیگ کے شیخ مجیب الرحمن نے جو چھ نکات پیش کیے تھے ان کا مسودہ بھارت
میں تیار کیا گیا تھا اور دہلی کے حکمرانوں کی منظوری حاصل کرنے کے بعد اسے
بروئے کار لانے کی ذمہ داری شیخ مجیب الرحمن کے سپرد کی گئی تھی۔
پاکستان کے دشمن عناصر کے ساتھ بھارت کی ریشہ دوانیاں پہلی بار 1967ء میں
منظر عام پر آئیں جب اگرتلہ سازس کیس کا انکشاف ہوا۔ متعدد لوگوں نے حلفاً
بیان کیا کہ شیخ مجیب الرحمان اس سازش میں ستمبر 1964ء میں ملوث ہو چکے تھے
جب مشرقی پاکستان کو باقی ملک سے الگ کرنے کے لئے ایک انقلابی تنظیم قائم
کی گئی تھی اگر تلہ سازش کا اہم منصوبہ یہ تھا کہ اسلحہ خانوں پر قبضہ کرکے
فوجی یونٹ مفلوج و معطل کردیئے جائیں۔ یہ کام وہ کمانڈوز کے انداز میں کرنا
چاہتے تھے۔ بھارت کی جاسوسی تنظیم ’’را‘‘ کے سربراہ سنکرن راؤ (اس کا فرضی
نام کرنل مینن تھا) کے بقول یہ بالکل ایسا تھا جیسے کوئی تنہا انسان رائفل
بردار فوجی کی رائفل پر ہاتھ ڈال دے اور اسے بزور قوت حاصل کرنے کی سازش
کرے۔ اچانک اقدام ہی سے افرادی قوت کی کمی پوری کی جاسکتی تھی اپریشن کا
کام کرنے کے لئے علیحدگی پسندوں اور بھارت کے نمائندوں کا اجلاس اگرتلہ میں
12جولائی 1967ء کو ہوا۔ ان سازشیوں کو دسمبر 1967ء میں گرفتار کرلیا گیا۔
ان میں مجیب الرحمان بھی تھے۔ ان میں سے ایک نے انکشاف کیا کہ بھارت نے
ہتھیار اور مالی امداد فراہم کرنے کے علاوہ مشرقی پاکستان بغاوت منظم کرنے
کا بھی وعدہ کیا تھا۔ بھارت نے کہا کہ وہ مشرقی پاکستان میں مسلح بغاوت کے
موقع پر مشرقی پاکستان کو مغربی پاکستان سے ملانے والے بحری اور فضائی
راستے بند کردے گا۔
بھارتی اخبارات نے اگرتلہ سازش کے بار ے میں تسلسل کے ساتھ گمراہ کن اور بے
بنیادی خبریں شائع کیں اور اس سازش کو مغربی پاکستان کی طرف سے مشرقی
پاکستان کو کچلنے کا منصوبہ قرار دیا۔ درحقیقت اگرتلہ سازش کیس حقائق پر
مبنی تھا اور بقول جی ڈبلیو چوہدری انہیں مجیب کے وکیل مسٹر عبدالسلام(یہ
عوامی لیگ کے اہم راہنماؤں میں شمار ہوتے تھے) نے ایک بار مجھے بتایا کہ
مجھے اگرتلہ سازش کیس میں بھارتی حکومت کے عمل دخل سے انکار نہیں لیکن
پاکستان کے اندر اگرتلہ سازش کیس کو جس بھونڈے طریقے سے چلایا گیا اس پر
مشرقی پاکستان کے عوام نے محسوس کیا کہ مجیب الرحمن کو اس لئے محرومیوں اور
اقتصادی ناہمواری کے خلاف آواز بلند کرتا ہے۔ تھوڑے ہی عرصہ میں مجیب نے
وہاں کی اکثریت کے لئے قومی ہیرو کا مقام حاصل کرلیا۔ مشرقی پاکستان میں
بغاوت برپا ہونے کے چھ دن بعد 31مارچ 1971ء کو انڈین کونسل آف ورلڈ آفیئر
کا ایک اجلاس ہوا اس میں تقریر کرتے ہوئے بعض مقتدر بھارتیوں نے انڈین
انسٹی ٹیوٹ آف ڈیفنس سٹڈیز کے ڈائریکٹر مسٹر کے سبرامینم کے ان خیالات کی
بھرپور تائید کی کہ ’’ہمیں احساس کرلینا چاہئے کہ پاکستان کا ٹکڑے ٹکڑے
ہونا ہمارے زبردست مفاد میں ہے۔ ایسا کرنے کے لئے اس سے بہتر موقع ہاتھ نہ
لگے گا‘‘۔ اس سمپوزیم میں بنگلہ دیش کے بحران کے حوالے سے کہا گیا ’’اپنے
دشمن نمبر ایک کو برباد کرنے کا اس سے بہتر مناسب اور سنہری موقع شاید ہی
پھر آئے‘‘۔بھارت نے بنگلہ دیش کی تحریک کی وسیع پیمانے پر امداد شروع کردی۔
بھارت کی پشت پناہی پر ہی 10اپریل 1971ء کو کلکتہ میں بنگلہ دیش کی جلا وطن
حکومت کے قیام کا اعلان کیا گیا۔ بھارت نے بارڈر سکیورٹی فورس کے ذریعے
مکتی باہنی کی تربیت اسلحہ کی سپلائی اور اپنی سرزمین کو مشرقی پاکستان پر
حملوں کے لئے چھاؤنی بنانے کی اجازت دیدی‘‘۔ پاک فوج اپنوں کی سیاسی ساز
باز اور بین الاقوامی سازش کا شکار بنی جس میں اس وقت کے آرمی چیف جنرل
یحییٰ خان اور جنرل عبداﷲ خان نیازی (اے کے نیازی) اپنی نااہلی اور مکروہ
عادات و اطوار کے باعث سازش کا آسانی سے شکار ہو گئے۔ اپنوں اور غیروں نے
اپنی تزویراتی اہداف کے حصول کیلئے پاکستان کے دو لخت ہونے کا سارا الزام
اور ملبہ پاک فوج پر ڈال دیا لیکن مشرقی پاکستان بنگلہ دیش تو بن گیا لیکن
بھارتی پالیسی خواہش اور حکمت عملی کے مطابق بھارت میں ضم نہ ہوسکا اور ایک
آزاد ملک کے طور پر اپنا تشخص آج بھی برقرار رکھے ہوئے ہے لیکن بدقسمتی سے
اُسی بنگلہ دیش میں 1971ء میں اپنی فوج اور اپنے ملک پاکستان کا ساتھ دینے
والی جماعت کو جرم پاکستانیت میں عدالتی انصاف کے قتل کے ذریعے پھانسیوں پر
چڑھایا جا رہا ہے۔
پاکستان کے ذرائع ابلاغ کو امریکہ، اسرائیل اور بھارت سمیت دیگر ممالک کی
طرح پاکستان کے استحکام و سلامتی کے معاملے پر اپنا موثر اور بھرپور کردار
ادا کرنا چاہئے کیونکہ ریاست پاکستان سیاسی و صحافتی مفادات سے بڑھ کر ایک
عطیہ خدا وندی ہے جس کے خلاف ہونے والی تمام سازشوں کا توڑ کرنا ایک پر
لازم ہے۔ جو عوامی لیگ بھارتی پراپیگنڈہ طرز و طریقہ اپناتے ہوئے الیکشن
جیتنے کے لئے بی این پی کی ساکھ کو خراب کرنے کے لئے اس کی کردار کشی کے
لئے جھوٹے الزامات اور ’’را‘‘ کے زرخرید میڈیا کے ذریعے میڈیا وار جاری
رکھے ہوئے ہے۔ پاکستان اور آئی ایس آئی کے خلاف نفرت پھیلانے اور اُبھرنے
کے لئے عوامی لیگ بھارتی بی جے پی کا ماڈل اپنا رہی ہے۔ جس بی جے پی نے
الیکشن جیتنے کے لئے بھارت میں نفرت آمیز پیغامات کے ذریعے مشتعل ہندوؤں کو
بھارت میں مسلمانوں کو نشانہ بنانے پر اُکسا رہی ہے۔ |