Hum Kiyun Sharminda Hu?

(HUBBA S. FEROZ, lahore)

Pyaray Shuhada Aps,
Ae Mairy Watan Ke Phoolon Jo Bina Khilay Murjha Gae Ho. Ae Woh Haseen Ankhon Jin Main Basay Khuwab Abhi Khuwab Tak Na Banay Thy. Ae Sada Dilon Jinky Jazbon Main Farishton Si Sachai Thi. Ae Mairy Masoom Shaheedo Aj Ka Din Tumhari Yaad Ka Din Hai. Pichly 2 Saal Se Zamana Hum Pr Batain Bana Raha Hai. Kahty Hain Ke Hamain Tumharay Khonay Ka Dukh Nahi. Hum Ne Tumhari Lashon Ka Sauda Kia Hai. Kahty Hain Ke Hum Aik Murda Quom Hain Jo Apni Bachay Kho Kar Bhi Baidar Nahi Hoti. Kahty Hain Ke Hum Apni Behisi Per Sharminda Tak Nahi. Hum Unko Jawabdeh Nahi Hain Magar Aj Ke Din Hum Tumhain Batana Chahty Hain Ke Koi Bhi Hamaray Ghum Ko Nahi Samajh Skta. Akhir Ko Tum Hamaray Bazoo Thy Humara Mustaqbil Thy. Anay Waly Dino Ki Umeed Thy. Koi Kia Janay Ke Hamara Kitna Nuqsan Hoa Hai. Aur Duniya Ki Soch Daikho Ke Nuqsan Bhi Hamara ,Ghum Bhi Hum Hi Ko Aur Ye Chahaty Hain Ke Sharminda Bhi Hum Hi Hu. Tum Hi Batao Kia Koi Apny Ghum Per Apny Nuqsan Per Sharminda Hota Hai. Daikho Hum Tumhain Bilkul Nahi Bholay. Aj Ki Har Tahreer Har Taqreer Har Mahfil Main Tum Hi Ho. Ye Jo Shamain Roshan Ki Gae Hain Kis Ke Liye Tumharay Liye Hi Na. Tum Ne Jannat Main Baith Ker In Roshan Shamon Ko Daikha Hoga Na. Akhir Hum Sharminda Kiyun Hu. Hum Tumhain Bholay Thori Hain. Maana Ke Hum Tumharay Gunagahru Ko Saza Nahi Dilwa Sakay. Magar Hum Unky Bachon Ko Parhanay Ka Azam To Rakhty Hain Na. To Kia Hoa Ke Tum Na Parh Saky Wo To Parh Jaen Ge Na. Kia Tumhay Iss Soch Per Fakhar Nahi. Ab Iss Tameeri Soch Per Bhi Kahty K Sharam Karo Mahaz Ganay Bana Kar Dushmono Ko Dara Rahay. Chalo Ye Nahi Samjhty Magar Tum To Samjhty Hi Ho. Jab Jannat Main Baith Ker Tum Apni Maon Ko Daikhty Ho To Kia Sochty Nahi Ke Kis Tarha Pori Quom Ne Unka Ghum Banta Hai Kia Ye Murda Quom Ke Tareeqay Hain. Sunno Tum Inki Baton Main Mat Ana. Tumhari Qabarain Pehly Se Hi Buhat Roshan Hain Iss Liye Tumhay Pata Nahi Chala Hoga Hum Ne Aj Tumhari Qabron Per Chiragah Kia Hai Phool Charaye Hain Aur Daikho Pori Quom Ne Tumhari Maghfirat Ki Dua Bhi Ki Halanky Farishton Ko Dua-E-Maghfirat Ki Kia Zaroorat Per Hum To Sada Loh Log Hai Tum To Janty Hi Ho. Ab Tum Hi Batao Iss Ke Baad Bhi Hum Sharminda Hu. Kahty Hain Hum Ne Laparwahi Ki. Theek Hai Laparwahi Ho Gae Per Tum To Janty Ho Ke Hum Insaan Hain Aur Insaan Se Laparwahi Aur Ghalti Ho Hi Jati Bus Hum Unko Rok Nahi Pae Laikin Iss Ki Saza Main Kiya Hum Ne Apny Jigar Goshay Nahi Kho Diye. Aik To Zulam Hum Per Upar Se Sawal Bhi Hum Per. Ab Tum Janat Main Baithy Ho Tum Kiya Jano Duniya Ki Sazishain. Daikho Tum Kabhi Ye Mat Sochna Ke Hum Tumko Bhool Jae Ge. Kabhi Bhi Nahi. Har Saal Ye Din Hum Tumhari Yaad Main Manae Ge. Mombatiyan Jala Ker, Tumhari Qabron Per Phool Chara Ker, Ansoo Baha Kar Hamaisha Tumhain Yaad Rakhain Ge. Bus Yahi Na Ke Hum Un Zalimo Ko Saza Nahi De Pae. Bus Yahi Na Dushman Mulak Se Karobaar Ki Khatir Hum Koi Qadam Nahi Utha Sakty. Magar Mairy Bacho! Tum To Samjhdar Ho Ab Marnay Walon Ke Sath Kon Marta Hai Jo Zinda Hain Unky Pait Bhi To Bharny Hain. Aur Phir Tum To Allah Ke Pass Ho Aur Wo Behter Badla Lainy Wala Hai. Tum Bilkul Mayoos Mat Hona Allah Tumhara Badla Hum Se Bather Lai Ga. Akhir Hum Muslman Hain Aur Hum Ne Sab Allah Per Chor Rakha Hai. Ab Batao Akhir Hum Kiyun Sharminda Hu?
Buhat Pyar Aur Duaon Ke Sath
Pakistani Quom By: Hubba S. Feroz

 

Comments Print Article Print
 PREVIOUS
NEXT 
About the Author: HUBBA S. FEROZ
Currently, no details found about the author. If you are the author of this Article, Please update or create your Profile here >>
15 Dec, 2016 Views: 592

Comments

آپ کی رائے