اٹلی میں ایک ایسا شہر ہے جہاں مکان کی قیمت صرف ایک یورو ہے، یعنی کوئی بھی شخص صرف ایک یورو جو کہ پاکستانی کرنسی میں 172 روپے بنتے ہیں کی ادائیگی کر کے باآسانی گھر خرید سکتا ہے۔
ایک رپورٹ کے مطابق اٹلی کے جنوبی علاقے کیمپانیا میں واقع بیساشیا نامی قصبے میں آبادی گھٹ چکی ہے کیونکہ یہاں کے زیادہ تر رہائشی دیگر بڑے شہروں میں منتقل ہو چکے ہیں جس کے باعث اب قصبے کے اکثر و بیشتر گھر خالی پڑے ہیں۔
بیساشیا کے میئر نے اپنے اعلان میں کہا کہ شہر میں آبادی کی کمی پیشی کو پورا کرنے کے لیے ہم اپنی عوام کو مشروط طور پر سستے گھر فراہم کر رہے ہیں۔
اُن کا کہنا تھا کہ گھر خریدنے والے شخص کو قصبے میں مستقل رہائش اختیار کرنے کے ساتھ کیمونٹی کا حصہ بننا ہوگا، زمین حکومت فراہم کرے گی جبکہ گھر کی تزئین و آرائش اور تعمیر خریدار کو کرنا ہوگی۔
میئر نے قصبے کے 90 گھر ایک یورو کی قیمت میں فروخت کرنے کا اعلان کرتے ہوئے کہا کہ ’میں امید کرتا ہوں کہ ہم دوبارہ اس قصبے کو آباد کر دیں گے۔
میئر کا مزید کہنا تھا کہ یہ قصبہ انتہائی خوبصورت اور تاریخی ہے، یہاں خوبصورت ساحل، پہاڑ اور جنگلات موجود ہیں۔ واضح رہے کہ اٹلی کے کئی قصبوں میں آبادی بڑھانے کے لیے عوام کو سستے گھروں کی پیش کش کی جارہی ہے۔