گزشتہ دو روز کے دوران کراچی میں سردی کی شدت میں کمی رہی جبکہ اب محکمہ موسمیات کی جانب سے نئی پیشگوئی کر دی گئی ہے۔
محکمہ موسمیات کے مطابق 28 جنوری سے شہر میں سردی کی نئی لہر آئے گی، جس کے دوران درجہ حرارت میں کمی واقع ہو گی۔ شہر کا کم سے کم پارہ 12 سے 14 ڈگری سینٹی گریڈ جبکہ زیادہ سے زیادہ 26 سے 28 ڈگری سینٹی گریڈ کے درمیان رہنے کا امکان ہے۔ آنے والے ایک سے دو روز کے دوران شہر میں صبح کے وقت مطلع جزوی طور پر ابرآلود رہے گا۔
اتوار کو شمال مشرقی ہواؤں کیساتھ سمندر کی جنوب مغربی ہوائیں چلیں جس کے سبب سردی میں کمی رہی۔ شہر قائد کا کم سے کم 13 ڈگری سینٹی گریڈ اور زیادہ سے زیادہ درجہ حرارت 28 ڈگری سینٹی گریڈ ریکارڈ کیا گیا۔
محکمہ موسمیات کے مطابق صبح کے وقت ہوا میں نمی کا تناسب 90 فیصد ریکارڈ کیا گیا۔ اس وقت شہر میں شمال مشرقی سمت سے ہلکی ہوائیں چل رہی ہیں۔