محکمہ پاسپورٹ اینڈ امیگریشن نے پریمیئر سروس کے آغاز کا فیصلہ کیا ہے جس کے تحت ریڈایبل پاسپورٹ کی آن لائن بکنگ کرائی جا سکے گی۔
ذرائع کے مطابق پاسپورٹ بنوانے یا اس کی تجدید کے خواہشمند افراد کے لئے مزید آسانیاں پیدا کر دی گئی ہیں کیونکہ اب پاسپورٹ بنوانے والوں کو نہ گھنٹوں طویل قطاروں میں لگنا پڑے گا اور نہ ہی ایجنٹوں کے ہاتھوں خوار ہونا پڑے گا۔ بلکہ پاسپورٹ کی پریمیئر سروس کے تحت آن لائن بکنگ کے بعد اپنا پاسپورٹ باآسانی بنوا سکیں گے۔
مشین ریڈ ایبل پاسپورٹ بنانے کے لیے آن لائن بکنگ کے بعد پاسپورٹ کے حصول کے خواہشمندوں کو ان کی مرضی کے مطابق وقت دیا جائے گا، اور جس وقت کی بکنگ ہو گی پاسپورٹ بنانے والے کو اس وقت پر پہنچنا لازمی ہوگا اگر کسی وجہ سے کچھ تاخیر ہو یا منسوخ کرانا ہو تو فوری آن لائن پریمیئر سروس کو آگاہ کرنا پڑے گا۔
پریمیئر سروس کے تحت صرف 10 سے 15 منٹ میں اپنا مشین ریڈ ایبل پاسپورٹ بنانے کا عمل مکمل کیا جائے گا۔ پریمیئر سروس کے عوض محکمہ پاسپورٹ اینڈ امیگریشن فیس کے علاوہ 1500 روپے اضافی سروس چارجز وصول کریں گے۔ پریمیئر کی سہولت شہرِ لاہور، کراچی، اسلام آباد، پشاور اور کوئٹہ سمیت ملک بھر کے بڑے شہروں میں جلد شروع کر دی جائے گی ۔ لاہور میں اس حوالے سے تیاریاں مکمل کر لی گئی ہیں جبکہ باقی شہروں میں بھی تیاریاں مکمل کی جا چکی ہے۔
اس حوالے سے ایک مکمل تفصیلی رپورٹ ڈائریکٹریٹ پاسپورٹ سیکرٹری داخلہ کو بجھوا دی گئی ہے اب وزارت داخلہ کی طرف سے اس رپورٹ کی روشنی میں جیسے ہی منظوری ملتی ہے آن لائن بکنگ کے ذریعے پاسپورٹ بنانے کا عمل شروع کر دیا جائے گا۔ لاہور سمیت ملک بھر کے ہزاروں افراد پریمیئر سروس سے مستفید ہو سکیں گے اور 1500 روپے ادا کرنا ان کے لیے کوئی مشکل کام نہیں۔