مہنگائی کے ستائے عوام پر ایک بار پھر پیٹرول بم گرانے کی تیاری، پیٹرولیم مصنوعات کی قیمتوں میں اضافے کی تجویز دے دی گئی۔
تفصیلات کے مطابق ملک میں پیٹرولیم مصنوعات کی قیمتوں میں اضافے کا امکان ہے، آئل اینڈ گیس ریگولیٹری اتھارٹی (اوگرا) کی جانب سے وزارت خزانہ کو قیمتوں سے متعلق سمری بھیجوا دی گئی ہے، وزارت خزانہ کو بھجوائی گئی سمری میں پیٹرولیم مصنوعات کی قیمتوں میں اضافے کی تجویز دی گئی ہے۔
ذرائع کے مطابق آئل اینڈ گیس ریگولیٹری اتھارٹی (اوگرا) کی جانب سے بھجوائی گئی سمری نئے سال پر عوام کے لئے ایک مہنگا تحفہ ثابت ہوگی، یکم جنوری 2020 سے ملک بھر میں پٹرول کی فی لیٹر قیمت میں دو روپے چھہتر پیسے اضافے کا امکان ہے جبکہ ڈیزل کی قیمت میں تین روپے بارہ پیسے فی لیٹر تک اضافے کا امکان ہے۔
یاد رہے کہ چند روز قبل ہی پیٹرولیم مصنوعات کی قیمتیں بڑھائی گئی تھیں، تاہم پیٹرول کی موجودہ قیمت اس وقت عام صارفین کیلئے 103 روپے 69 پیسے فی لیٹر ہے جبکہ ہائی سپیڈ ڈیزل کی قیمت ایک سو آٹھ روپے چوالیس پیسے ہے تاہم اوگرا کی جانب سے ممکنہ اضافے کے بعد پیٹرول کی قیمت 106.45 اور ڈیزل کی قیمت 111.56 ہو جائے گی۔