پانامہ لیکس کے بعد اب دنیا کی سب سے بڑے ڈیٹا لیکس پنڈورا پیپرز میں دنیا بھر سے بڑے حکمرانوں کے ناموں کی فہرست سامنے آگئی ہے جس میں میڈیا رپورٹس کے مطابق 700 سے زائد پاکستانیوں کے نام شامل ہیں۔
کہا جا رہا ہے کہ یہ پنڈورا کی تحقیقات اب تک کی سب سے بڑی تحقیق ہے جن میں دنیا کے کئی بڑے حکمرانوں کے نام شامل ہیں۔
تفصیلات کے مطابق پنڈورا پیپرز میں پاکستان کے وزیرخزانہ شوکت ترین کا نام بھی شامل ہے جبکہ ایک اور وفاقی وزیر مونس الٰہی اور سینیٹر فیصل واوڈا کی آف شور کمپنیز کی تفصیلات بھی سامنے آگئی ہیں۔ پنڈورا کی تحقیقات میں پنجاب کے سابق وزیر عبدالعلیم خان کی آف شور کمپنی سامنے آئیں جبکہ مسلم لیگ ن کے رہنما اسحاق ڈار کے بیٹے کا نام بھی پنڈورا پیپرز کی فہرست میں شامل ہے۔
پاکستان پیپلز پارٹی سے بھی ایک بڑا نام پنڈورا لیکس میں شامل ہوا ہے جن میں شرجیل انعام میمن کی آف شور کمپنی بھی شامل ہے۔ اس کے علاوہ وفاقی وزیرصنعت خسرو بختیارکے اہل خانہ کی آف شورکمپنی بھی پنڈورا پیپرزمیں سامنے آئی ہے۔
وزیراعظم کےسابق معاون خصوصی وقارمسعود کے بیٹے کی بھی آف شورکمپنی نکل آئی جبکہ ایگزیکٹ کمپنی کے بانی شعیب شیخ کی آف شور کمپنی بھی پنڈورا پیپرزمیں شامل ہے۔
اس کے علاوہ پنڈورا پیپرز میں کچھ ریٹائرڈ فوجی افسران، بینک مالکان، تجارتی شخصیات اور کچھ میڈیا مالکان کی آف شورکمپنیز بھی سامنے آئی ہیں۔