کیا آپ نے کبھی گاڑی کی ہیڈ لائٹس جلا کر امتحانی پرچہ حل کیا ہے؟ یہ سوال اگرچہ کافی حیرت انگیز ہے لیکن ایسا ہی ایک واقعہ پیش آیا ہے بھارت کی ریاست بہار میں جہاں بارہویں جماعت کے 400 سے زائد طلبا نے لائٹ جانے کی وجہ سے گاڑیوں کی ہیڈلائٹس کی مدد سے امتحانی پرچہ حل کیا۔
بد انتظامی کی انتہا
ہوا کچھ یوں کہ مقامی کالج میں 31 جنوری کو دوپہر کی شفٹ میں 2 سے شام 5 بجے تک امتحان ہونا تھا لیکن انتظامی بدنظمی کی وجہ سے پرچہ شام کو ساڑھے چار بجے شروع ہوا اور رات ٨ بجے تک جاری رہا اسی دوران لائٹ جانے کی وجہ سے پورے علاقے میں اندھیرا چھا گیا اور طلبا کے والدین نے گاڑیوں کی ہیڈ لائٹس جلائیں تاکہ ان کے بچے امتحان دے سکیں۔
افسران کے خلاف تحقیقات
طلبا کی بے چارگی اور انتظامی بدنظمی سے بھرپور واقعے کی ویڈیو سوشل میڈیا پر تیزی سے وائرل ہورہی ہے اور بد انتظامی کے ذمہ دار افسران کے خلاف تحقیقات شروع کی جاچکی ہیں ۔