ایف آئی اے اسلام آباد کے اینٹی کرپشن سیل نے سابق ڈی جی آئی ایس آئی لیفٹیننٹ جنرل (ر) فیض حمید کے بھائی نجف حمید اور دیگر افراد کے خلاف غیر قانونی طور پر قیمتی سرکاری زمین منتقل کرنے کے الزام میں مقدمہ درج کر لیا ہے۔
مقدمہ ملازم حسین آف پنڈ پڑیاں کی مدعیت میں درج کیا گیا جس میں نجف حمید، سابق ریونیو افیسر اسلام آباد عبدالظہور اور سہولت کار خالد منیر کو بطور ملزمان نامزد کیا گیا ہے۔ مدعی کے مطابق ملزمان نے ملی بھگت کے ذریعے ایک کنال قیمتی اراضی غیر قانونی طور پر خالد منیر کے نام منتقل کی۔
ایف آئی اے حکام نے تصدیق کی ہے کہ معاملے کی باقاعدہ تفتیش شروع کر دی گئی ہے اور تمام پہلوؤں کا جائزہ لینے کے بعد قانون کے مطابق کارروائی عمل میں لائی جائے گی۔