سکھر: پاکستان تحریک انصاف کے چیئرمین عمران خان نے کہا ہے کہ کپتان اور سندھ کے نوجوان مل کر زرداری کا مقابلہ کریں گے ،سندھ میں تباہی آئی ہے ،اگلی باری ہمیں موقع ملا تو ملک بھر میں ڈیم بنائیں گے۔
سکھر میں کارکنوں سے خطاب کرتے ہوئے عمران خان نے کہا کہ اندرون سندھ کی پسماندگی اور غربت کی وجہ زرداری اور اس کی ٹیم ہے زرداری سندھ کارڈ کھیل رہا ہے اور سندھ کو لوٹ رہا ہے اور کرپشن کا پیسہ باہر بھیجتا رہا ہے اسے پیسے بنانے کی بیماری ہے میں وعدہ کرتا ہوں کہ ڈاکو زرداری کو شکست دینی ہے۔
انہوں نے کہا کہ میں سکھر اس لیے آیا ہوں کہ سیلاب نے جو تباہی مچائی ہے میں خود اس کا جائزہ لے سکوں پاکستان میں سب سے زیادہ متاثر صوبہ سندھ ہے۔بدقسمتی سے سندھ میں بہت زیادہ نقصان ہواہے ٹیلی تھون سے جو میں نے پیسہ جمع کیا ہے اس میں سے ایک ارب روپے یہاں لگائیں گے اور آئندہ اتوار کو میں پھر سندھ کے لوگوں کے لیے ٹیلی تھون کروں گا۔
انہوں نے کہا کہ اصل میں پہاڑوں سے جو پانی آیا ہے اس کی وجہ سے پورے سندھ میں تباہی آئی ہے انشا اللہ اگلی بار ہمیں موقع ملا تو ملک بھر میں ڈیم بنائیں گے جب بھی بارش کا راستہ روکا جائے گا تو ہ نقصان مچائے گا ۔ہم جب حکومت میں آئیں گے تو سب سے پہلے ڈرینج کا نظام بہتر کریں گے۔