برطانیہ پر 70 سالوں سے حکومت کرنے والی ملکہ الزبتھ کی موت پر دنیا بھر میں افسوس کا اظہار کیا جارہا ہے۔ انتقال کے وقت ملکہ کی عمر 96 برس تھی اور وہ 4 بچوں کی والدہ ہونے کے ساتھ 8 پوتے اور 12 پڑ پوتے پوتیوں کی دادی تھیں۔ ملکہ کے انتقال کی تصدیق اور سرکاری سطح پر اعلان ہونے کے ساتھ ہی برطانیہ کا قومی پرچم سرنگوں کردیا گیا اور “لندن برج از ڈاؤن“ (ملکی کی موت کا خفیہ کوڈ) کی پیچیدہ تقریبات شروع کردی گئیں۔
10 روز تک کی جانے والی آخری رسومات
روایت کے مطابق بکھنگم پیلس کے دروازے پر سیاہ فریم میں ملکہ کی موت کا نوٹ لگا دیا گیا۔ ملکہ کی موت کے دن کو ڈی ڈے کہا جائے گا جو کہ بنیادی طور پر بڑے آپریشن کے لئے استعمال کی جانے والی فوجی اصطلاح ہے۔ ملکہ کی موت کا اگلا دن ڈی پلس ون کہا جائے گا اور اس کے بعد ڈی10 کو ملکہ کے سوگ کی آخری رسومات ادا کی جائیں گی۔
23 گھنٹوں تک عوام ملکہ کا آخری دیدار کرسکے گی
ڈی ون کو شہزادہ چارلس کے بادشاہ ہونے کی تصدیق کی جائے گی اور اگلے دن کی تقریبات کی منصوبہ بندی کی جائے گی۔ ڈی ڈے ٹو کو ملکہ کا تابوت بکھنگم پیلس میں رکھا جائے گا اور میت کو ویسٹ منسٹر ہال کے درمیان میں 23 گھنٹوں تک رکھا جائے گا تاکہ عوام ملکہ کا آخری دیدار کرسکیں۔
ملکہ کی تدفین کب ہوگی؟
منصوبے میں آخری وقت تک تبدیلی ہوسکتی ہے لیکن اگر طے شدہ منصوبے پر عمل کیا گیا تو ملکہ کا جنازہ 10 ویں روز ادا کیا جائے گا اور ونڈسر کیسل میں ان کی تدفین کی جائے گی۔