صوبہ پنجاب کے دارالحکومت لاہور کی انسداد دہشت گردی کی عدالت نے کور کمانڈر ہاؤس اور عسکری ٹاور حملہ کیس میں گرفتار پی ٹی آئی کی کارکن اور فیشن ڈیزائنر خدیجہ شاہ کے جوڈیشل ریمانڈ میں 14 دنوں کی توسیع کر دی ہے۔
پیر کو ریمانڈ پورا ہونے پر پولیس کی جانب سے خدیجہ شاہ کو انسداد دہشت گردی کی عدالت میں پیش کیا گیا۔خدیجہ شاہ کے خلاف لاہور کے گلبرگ پولیس سٹیشن میں مقدمہ درج ہے۔پیشی کے موقع پر عدالت نے جلد مقدمے کا چالان پیش کرنے کی ہدایت کی۔عدالت کی جانب سے خدیجہ شاہ کو 17 جولائی کو دوبارہ پیش کرنے کا حکم بھی دیا گیا۔12 جون کو خدیجہ شاہ کی ضمانت کی درخواست پر ہونے والی سماعت میں ان کے وکیل سمیر کھوسہ نے دلائل دیے تھے تاہم بعدازاں سماعت ملتوی کر دی گئی تھی۔خیال رہے امریکی شہریت رکھنے والی خدیجہ شاہ پاکستان کی ایک معروف فیشن ڈیزائنر ہیں۔ وہ پاکستان کے سابق آرمی چیف جنرل آصف نواز جنجوعہ کی نواسی اور سابق وفاقی وزیر خزانہ سلمان شاہ کی صاحبزادی ہیں۔9 مئی کو لاہور میں کور کمانڈر کے گھر پر حملے کے بعد خدیجہ شاہ پولیس کو مطلوب تھیں تاہم وہ کئی روز تک روپوش رہیں اور بعدازاں ان کو گرفتار کیا گیا۔