پاکستان پیپلز پارٹی کے چیئرمین اور سابق وزیر خارجہ بلاول بھٹو زرداری کے کاغذات نامزدگی پر لاہور کے ایک شہری نے اعتراض دائر کر دیا ہے۔
بدھ کو لاہور کے شہری محمد ایاز نے پاکستان پیپلز پارٹی کے چیئرمین بلاول بھٹو زرداری کے کاغذات نامزدگی پر اعتراض کی درخواست ریٹرننگ افسر کو جمع کروا دی ہے۔لاہور کے حلقہ این اے 127 سے کاغذات نامزدگی پر اعتراض دائر کیا گیا۔درخواست میں کہا گیا ہے کہ بلاول بھٹو زرداری نے اپنے کاغذات نامزدگی میں پاکستان پیپلز پارٹی پارلیمنٹیرینز سے وابستگی ظاہر کی۔درخواست میں موقف اپنایا گیا ہے کہ پاکستان پیپلز پارٹی اور پاکستان پیپلز پارٹی پارلیمنٹرینز الگ الگ سیاسی جماعتیں ہیں۔ ’پاکستان پیپلز پارٹی کا انتخابی نشان تلوار اور پاکستان پیپلز پارٹی پارلیمنٹرینز کا نشان تیر ہے۔‘درخواست میں کہا گیا ہے کہ’بلاول بھٹو زرداری پیپلز پارٹی کے چیئرمین اور آصف زرداری پیپلز پارٹی پارلیمنٹیرینز كا صدر ہیں۔‘درخواست کے مطابق الیکشن ایکٹ 2017 کے مطابق ایک شخص ایک وقت میں ایک جماعت کا رکن ہو سکتا ہے۔ یہ الیکشن ایکٹ کی خلاف وزری ہو رہی ہے۔بلاول بھٹو زرداری کے کاغذات نامزدگی کی جانچ پڑتال 28 دسمبر کو ہو گی۔