اسلام آباد۔8جنوری (اے پی پی):سپیکر قومی اسمبلی راجہ پرویز اشرف نے شمالی وزیرستان میں دہشت گردوں کے ساتھ فائرنگ کے تبادلے میں حوالدار محمد ظاہر کے جانی نقصان پر افسوس کا اظہار کیا ہے ۔ پیر کو اپنے ایک بیان میں انہوں نے حوالدار محمد ظاہر کو دہشت گردوں کا بہادری سے مقابلہ کرتے ہوئے شہادت کے مرتبے پر فائز ہونے پر خراج عقیدت پیش کیا اور شہید کے اہلخانہ سے تعزیت کا اظہار کیا ۔
انہوں نے دہشت گردوں کے خلاف کامیاب آپریشن پر سکیورٹی فورسز کو خراج تحسین پیش کیا اور کہا کہ پوری قوم سکیورٹی فورسز کے شانہ بشانہ کھڑی ہے۔انہوں نے کہا کہ دہشت گرد کبھی بھی اپنے مذموم مقاصد میں کامیاب نہیں ہوں گے۔ سپیکر قومی اسمبلی نے اللہ تعالیٰ سے شہید کے درجات کی بلندی اور لواحقین کیلئے صبر جمیل عطاء کرنے کی بھی دعا کی ۔