اسلام آباد۔28فروری (اے پی پی):نیشنل ڈیزاسٹر منیجمنٹ اتھارٹی نے ملک کے مختلف علاقوں میں شدید بارشوں اور برف باری اور اس کے نتیجے میں سیلابی صورتحال و لینڈ سلائیڈنگ کے امکانات کے پیش نظر متعلقہ صوبائی ڈیزاسٹر مینجمنٹ اتھارٹیز کو ہدایت کی ہے کہ وہ صورتحال کی مکمل نگرانی کریں اور کسی بھی ہنگامی صورتحال سے نمٹنے کے لیے ہمہ وقت تیار رہیں، ممکنہ خطرے سے دوچار علاقوں میں امدادی ٹیموں اور مشینری کی بروقت دستیابی کی یقینی بنایا جائے۔
ترجمان این ڈی ایم اے کے مطابق محکمہ موسمیات پاکستان (پی ایم ڈی) نے پیش گوئی کی ہے کہ 29 فروری تا 2 مارچ 2024 تک ملک کے بیشتر علاقوں میں گرج چمک کے ساتھ بارشوں کا سلسلہ متوقع ہے۔ پیش گوئی کے مطابق گوادر، کراچی، حیدرآباد، راولپنڈی، پشاور، مردان، اسلام آباد، ملتان، سیالکوٹ، ناروال اور لاہور میں سیلابی صورتحال پیدا ہو سکتی ہے۔ شدید بارشوں اور برف باری کے باعث بلوچستان، خیبر پختونخوا، گلگت بلتستان اور آزا د کشمیرکے پہاڑی علاقوں میں لینڈ سلائیڈنگ بھی متوقع ہے۔ممکنہ لینڈ سلائیڈنگ سے رابطہ سڑکیں متاثر ہو سکتی ہیں۔ متعلقہ صوبائی ڈیزاسٹر مینجمنٹ اتھارٹیز کو ہدایت کی گئی ہے کہ وہ صورتحال کی مکمل نگرانی کریں اور کسی بھی ہنگامی صورتحال سے نمٹنے کے لیے ہمہ وقت تیار رہیں، ممکنہ خطرے سے دوچار علاقوں میں امدادی ٹیموں اور مشینری کی بروقت دستیابی کی یقینی بنائیں۔ سیاحوں کی حفاظت کو یقینی بنانے کے لیے ممکنہ موسمی صورتحال سے آگاہی فراہم کریں۔ سیاحوں کو ہدایت کی گئی ہے کہ سفر کے آغاز سے قبل متعلقہ علاقے کےموسم اور سڑکوں کی صورتحال سے آگاہ رہیں۔