اسلام آباد۔29فروری (اے پی پی):انٹرنیشنل سول ایوی ایشن آرگنائزیشن (آئی کائو) کی یونیورسل سکیورٹی آڈٹ پروگرام کی ٹیم نے مانیٹرنگ اپروچ کے تسلسل کے تحت دورہ پاکستان مکمل کر لیا ، پاکستان سول ایوی ایشن اتھارٹی کے اقدامات کی تعریف کی ۔ پاکستان سول ایوی ایشن اتھارٹی کے ترجمان کی طرف سے جمعرات کو جاری بیان کے مطابق چار رکنی آئی کائو سکیورٹی آڈٹ ٹیم نے سول ایوی ایشن ہیڈکواٹرز کے دورہ کے موقع پر ڈی جی اور ڈپٹی ڈی جی ریگولیٹری سے ملاقات کی ۔ آئی کائو ٹیم نے ڈی جی اور ڈپٹی ڈی جی کو پاکستان سول ایوی ایشن انڈسٹری کے سکیورٹی سسٹمز کے مکمل ہونے والے آڈٹ کے بارے میں بریف کیا۔
ٹیم لیڈر مسٹر آسکر روبیو انیبال نے ڈی جی سی اے اے کو سی اے اے ایکٹ 2023 قانون سازی اور اس کے نتیجہ میں سکیورٹی شعبہ کی نمایاں کارکردگی پر مبارک باد دی۔ پاکستان نے باآسانی نہ صرف نئے (آئی کیو) بینچ مارک/معیار 2023 کو حاصل کیا بلکہ وہ (آئی کیو) 2030 کے گولز/مقاصد حاصل کرنے کے بہت قریب آیاہے۔ اسکر روبیو نے کہا کہ بنیادی طور پر آڈٹ ٹیم نے پانچ روز سول ایوی ایشن سکیورٹی ڈائریکٹوریٹ کا جائزہ لیا۔ مزید چار روز دستاویزات میں پروٹوکولز کے نفاذ کے حوالے سے مشاہدات کئے۔ اس کے ساتھ ساتھ جناح انٹرنیشنل ایئرپورٹ کے تمام ایوی ایشن سکیورٹی شعبوں بشمول ایئرپورٹ، اے ایس ایف، ایئر لائنز (ملکی اور بین الاقوامی) اقدامات کی جانچ پڑتال کی۔جناح انٹر نیشنل ایئرپورٹ پر کارگو کمپنیوں، گرائونڈ ہینڈلنگ کمپنیوں، کیٹرنگ کمپنیوں وغیرہ کے طریقہ کار کا تفصیلی آڈٹ کیا گیا۔ بین القوامی سکیورٹی ایوی ایشن آرگنائزیشن کی ٹیم نے آڈٹ کے دوران پاسپورٹ آفس کا بھی دورہ کیا اور بریفنگ کے بعد طریقہ کار سے مطمئن اور متاثر نظر آئے۔ ٹیم نے ایف آئی اے امیگریشن کے عملے سے بھی بات چیت کی اور ان کے کام کے طریقہ کار کی بھی جانچ پڑتال کی۔ موجودہ مکمل سکیورٹی آڈٹ 2019 کے جزوی آڈٹ کے بعد پہلا ان سائٹ فل سکیل آڈٹ تھا۔ سکیورٹی آڈٹ ٹیم نے روایتی پاکستانی مہمان نوازی پر سی اے اے حکام کا شکریہ ادا کیا۔ڈی جی سی اے اے نے مہمانوں کو یادگاری تحائف پیش کئے اور نیک خواہشات کے ساتھ الوداع کیا۔