اسلام آباد۔21مارچ (اے پی پی):الپائن کلب آف پاکستان اور وفاقی نظامت تعلیمات کے اشتراک سے اسلام آباد ماڈل پوسٹ گریجویٹ کالج ایچ 8 میں ایک معلوماتی اور تربیتی سیمینار کا انعقاد کیا گیا۔ سیمینار کی صدارت ڈائریکٹر جنرل وفاقی نظامت تعلیمات اسلام آباد ایئر کموڈور (ریٹائرڈ) تنویر احمد نے کی جبکہ الپائن کلب آف پاکستان کے صدر و جوائنٹ سیکرٹری مشترکہ معاملاتی کونسل ابوذر صادق تقریب کے مہمان اعزاز تھے۔ سیمینار کا مقصد طلباء و طالبات کو ماحولیات ، فطرت، صحت اور نظم و ضبط کے متعلق آگاہی فراہم کرنا تھا۔
صدر الپائن کلب نے طلباء و طالبات کو الپائن کلب آف پاکستان کے اغراض و مقاصد سے آگاہ کیا اور انہیں آئندہ ہونے والے پروگراموں میں شرکت کی دعوت دی۔ڈی جی تنویر احمد نے کہا کہ جسمانی صحت اور نظم و ضبط طالب علموں کے لیے آج کے مشینی دور میں ازحد ضروری ہیں ۔ پرنسپل پروفیسر ڈاکٹر محمد خالد نے طلباء و طالبات کو ہم نصابی اور غیر نصابی سرگرمیوں میں حصہ لینے کی افادیت سے آگاہ کیا۔ الپائن کلب کی جانب سے ڈی جی اور میزبان کالج کے پرنسپل ڈاکٹر محمد خالد اور شعبہ جغرافیہ کے پروفیسر ارشد وانی کو اعزازی شیلڈ پیش کی گئی۔