پاکستان کی قومی اسمبلی کے ڈپٹی سپیکر اور نواب شاہ سے منتخب ہونے والے پیپلز پارٹی کے رہنما سید غلام مصطفٰی شاہ نے کہا ہے کہ نو منتخب قومی اسمبلی کا اپوزیشن لیڈر تحریک انصاف کی حمایت یافتہ سنی اتحاد کونسل سے ہو گا یا نہیں اس بات کا فیصلہ وزارت قانون کی پر منحصر ہے۔
اردو نیوز کے ساتھ ایک خصوصی انٹرویو میں سید غلام مصطفٰی شاہ نے کہا کہ اپوزیشن لیڈر کے انتخاب کے بارے میں وزارت قانون بتائے گی کہ اس سلسلے میں قانون کیا کہتا ہے۔واضح رہے کہ قومی اسمبلی سیکرٹیریٹ نے شعبہ قانون سے رائے طلب کر رکھی ہے کہ کیا ایک ایسی جماعت اپوزیشن لیڈر منتخب کروا سکتی ہے جس کے ٹکٹ پر کوئی رکن اسمبلی منتخب نہیں ہوا؟ یہ تنازع اس لیے سامنے آیا ہے کیونکہ سنی اتحاد کونسل کے سبراہ حامد رضا نے خود آزاد حیثیت میں انتخاب میں حصہ لیا اور پی ٹی آئی کی حمایت سے منتخب ہوئے جب کہ پی ٹی آئی کے حمایت یافتہ تمام اراکین اسمبلی انتخابات کے بعد سنی اتحاد کونسل میں شامل ہو گئے۔غلام مصطفٰی شاہ نے کہا کہ ’وزارت قانون بتا سکتی ہے کہ قانون کیا کہتا ہے، جب وہ رائے آ جائے گی تو اس پر فیصلہ ہو جائے گا۔ اس بارے میں جو قانون کے اندر ہو گا وہ ہو گا۔ وزارت قانون کے جواب کا انتظار کریں۔‘انہوں نے کہا کہ اپوزیشن لیڈر کے انتخاب کے علاوہ قائمہ کمیٹیوں کی تشکیل کے معاملات بھی تعطل کا شکار ہیں اور پارلیمان مکمل طور پر تب ہی فعال ہو گی جب یہ تمام معاملات طے پا جائیں گے۔انہوں نے توقع ظاہر کی کہ ماہِ رمضان کے بعد یہ امور طے کر لیے جائیں گے۔’تحریک انصاف نے رابطہ کیا تو پیپلز پارٹی غور کرے گی‘غلام مصطفیٰ شاہ نے کہا کہ پیپلز پارٹی تمام سیاسی جماعتوں کے ساتھ مل کر چلنا چاہتی ہے اور اس کے دروازے سب جماعتوں کے لیے کھلے ہیں۔ان سے جب پوچھا گیا کہ کیا پیپلز پارٹی مستقبل میں تحریک انصاف کے ساتھ اتحاد بنا سکتی ہے تو ان کا کہنا تھا کہ پیپلز پارٹی کے دروازے کھلے ہیں۔ ’اگر وہ (تحریک انصاف) اب بات نہیں کرنا چاہ رہے تو جب ان کو موقع محسوس ہوا تو پیپلز پارٹی پھر دوبارہ غور کرے گی کہ کیا یہ بات کرنے کے لیے موزوں وقت ہے۔ اس میں کوئی عیب نہیں ہے، سیاسی قوتوں کو میز پر آنا چاہیے، سب باتیں میز پر طے ہونی چاہییں۔‘قومی اسمبلی میں عمران خان کی تصویریں لانے کے معاملے پر غلام مصطفٰی شاہ نے کہا کہ اسمبلی کی کارروائی کے دوران باہر سے کوئی چیز لانے کی اجازت نہیں ہے (فوٹو: اے ایف پی)انہوں نے کہا کہ پیپلز پارٹی اور تحریک انصاف کے مابین پہلے بھی رابطہ ہوا تھا۔ ’جب (سال 2022) میں خان صاحب کی حکومت جا رہی تھی تو انہوں نے پیپلز پارٹی سے رابطہ کیا تھا لیکن اس وقت وہ بہت لیٹ ہو گئے تھے۔‘ایک اور سوال کے جواب میں قومی اسمبلی کے ڈپٹی سپیکر نے کہا کہ ایوان میں اپوزیشن کو موقع ملنا چاہیے تاکہ وہ اپنی آواز پہنچا سکیں۔ ’کوشش کریں گے کہ اپوزیشن کو زیادہ وقت ملے، وہ اپنا اظہار خیال کر سکے۔ ان کو وقت ملنا چاہیے، حکومت کو بھی وقت ملنا چاہیے جواب دینے کا۔ اور پھر اگر اپوزیشن اس کا جواب دینا چاہے تو پھر ان کو وقت ملنا چاہیے۔‘اسمبلی میں عمران خان کی تصاویر کا معاملہ ایڈوائزری کمیٹی حل کرے گیقومی اسمبلی میں عمران خان کی تصویریں لانے کے معاملے پر غلام مصطفٰی شاہ نے کہا کہ اسمبلی کی کارروائی کے دوران باہر سے کوئی چیز لانے کی اجازت نہیں ہے۔’ہاؤس ایڈوائزری کمیٹی میں آپ فیصلہ کرتے ہیں کہ آپ نے ایوان کو کس طریقے سے چلانا ہے اور اس میں کیا کیا چیزیں آنی ہیں، یہ ایک طریقہ کار ہے جو آگے بڑھتا ہے۔ اسی طرح آگے چلتا رہے گا۔ یہ مسئلہ ہاوس ایڈوائزری کمیٹی میں حل ہونا چاہیے، ہو جائے گا۔ اس کا احساس ہو جائے گا۔‘پارلیمنٹ کا مستقبل: ’پانچ سال دور کی بات دو مہینے کا کچھ نہیں کہہ سکتے‘موجودہ پارلیمنٹ کے مستقبل کے بارے میں پوچھے گئے ایک سوال کے جواب میں غلام مصطفٰی شاہ نے کہا کہ ’اس وقت اس بارے میں کچھ نہیں کہا جا سکتا پانچ سال تو دور کی بات ہے، دو مہینے کا آپ کچھ نہیں کہہ سکتے کہ حالات کس طرف جائیں گے۔‘ایک اور سوال کے جواب میں انہوں نے کہا کہ ’پیپلز پارٹی کی کارکردگی پر کی جانے والی تنقید غلط ہے۔ یہ پیپلز پارٹی کی کارکردگی ہی ہے کہ یہ بار بار منتخب ہو کر آتی ہے۔‘غلام مصطفٰی شاہ نے کہا کہ ’آپ کو اسمبلی میں آصفہ بھٹو کی صورت میں بے نظیر کا عکس نظر آئے گا۔‘ (فوٹو: پی پی پی)انہوں نے کہا کہ ’سندھ میں بے پناہ ترقیاتی کام ہو رہے ہیں، خود میرے حلقے میں کئی بڑے پل بنے ہیں اور شاہراہیں بنی ہیں، ہسپتال، یونیورسٹیاں، میڈیکل کالج اور کیڈٹ کالج بنے ہیں۔ یہی وجہ ہے کہ ہم بھاری اکثریت سے جیت کر آتے ہیں۔‘سیلاب کے بعد سندھ میں مہنگائی، بے روزگاری، جرائم کا اضافہسید غلام مصطفٰی شاہ نے اعتراف کیا کہ حالیہ سیلاب کے بعد سندھ میں بے روزگاری اور مہنگائی کا اضافہ ہوا ہے اور اسی وجہ سے جرائم بھی بڑھے ہیں۔’یہ (جرائم) پہلے سے زیادہ ہیں، بلاول بھٹو زرداری، صدر آصف زرداری اور وزیراعلٰی اس معاملے کو دیکھ رہے ہیں۔ وہاں کئی آپریشنز ہوئے ہیں۔ حکومت کی ذمہ داری ہے کہ بہتر پرفارم کرے اور کرے گی۔‘’آصفہ بھٹو بے نظیر کا عکس ہیں، مستقبل کے وزیراعظم بلاول ہوں گے‘آصفہ بھٹو کے رکن قومی اسمبلی بننے سے متعلق ایک سوال کے جواب میں غلام مصطفٰی شاہ نے کہا کہ ’وہ شہید بے نظیر کی تصویر ہے، وہ والد کی آبائی نشست پر آئی ہیں۔ آپ کو اسمبلی میں (ان کی صورت میں) بے نظیر کا عکس نظر آئے گا۔‘تاہم جب ان سے پوچھا گیا کہ کیا وہ آصفہ بھٹو زرداری کو مستقبل کا وزیراعظم دیکھتے ہیں تو انہوں نے کہا کہ ’اس وقت ہم بلاول بھٹو زرداری کو مستقبل کا وزیر اعظم دیکھتے ہیں، وہی اس وقت ہمارے سیاسی رہنما ہیں، ہماری جماعت کے رہنما ہیں۔‘