حکومتِ بلوچستان نے کفایت شعاری اور ایندھن کی بچت کے لیے مختلف اقدامات کا اعلان کرتے ہوئے سرکاری گاڑیوں کے ایندھن کے استعمال میں تین ماہ کے لیے 50 فیصد کمی کردی۔
اعلامیے کے مطابق سرکاری گاڑیوں کی نئی خریداری اور سرکاری سطح پر غیر ملکی دوروں پر پابندی عائد کردی گئی ہے، جبکہ سرکاری عشائیوں، سیمینارز اور کانفرنسز کے انعقاد پر بھی پابندی ہوگی۔
حکومتِ بلوچستان نے تنخواہوں اور پنشن کے علاوہ دیگر سرکاری اخراجات میں 5 فیصد کمی کا فیصلہ کیا ہے۔ شادی کی تقریبات میں ون ڈش پالیسی پر سختی سے عملدرآمد یقینی بنانے کی ہدایت بھی کی گئی ہے۔
اعلامیے کے مطابق صوبے بھر میں بازار، مارکیٹیں اور شاپنگ مالز رات 9 بجے بند ہوں گے، میرج ہالز رات 10 بجے جبکہ ریسٹورنٹس رات 11 بجے تک کھلے رہ سکیں گے۔
فارمیسیز، اسپتال، پیٹرول پمپس اور ڈیری شاپس کو مقررہ اوقات کی پابندی سے مستثنیٰ قرار دیا گیا ہے۔
حکومت کے مطابق کفایت شعاری اور ایندھن بچت کے یہ اقدامات فوری طور پر نافذالعمل ہوں گے۔