وزارت تعلیم پنجاب نے بڑھتی ہوئی گرمی کے پیش نظر سکولوں کے اوقات کار میں تبدیلی کا فیصلہ کیا ہے اور یکم جون سے 14 اگست تک موسم گرما کی تعطیلات کا اعلان کیا ہے۔
جمعے کو وزارت تعلیم پنجاب کی جانب سے جاری نوٹیفکیشن کے مطابق سکولوں کے اوقات صبح 7 سے لے کر ساڑھے 11 بجے تک ہوں گے۔وزیرتعلیم رانا سکندر حیات نے کہا ہے کہ ہیٹ ویو نے شدت اختیار کی تو مئی کے آخری پانچ دنوں میں سکول بند کرنے کا آپشن بھی زیر غور ہے۔ان کا کہنا تھا کہ پہلے مرحلے میں سکولوں کے اوقات کم کیے جا رہے ہیں۔پنجاب میں ہیٹ ویو کی وجہ سے سکولز ایجوکیشن پنجاب نے گرمیوں کی چھٹیوں کا اعلان کر دیا ہے جس کے تحت یکم جون سے چودہ اگست تک گرمیوں کی چھٹیوں ہوں گی۔واضح رہے کہ پاکستان میں قدرتی آفات سے نمٹنے کے ادارے نیشنل ڈیزاسٹر مینجمنٹ اتھارٹی نے صوبہ سندھ اور پنجاب میں گرمی کی لہر کا خدشہ ظاہر کیا ہے اور شہریوں کو احتیاط برتنے کی ہدایت کی ہے۔جمعرات کو نیشنل ڈیزاسٹر مینجمنٹ اتھارٹی (این ڈی ایم اے) نے جاری بیان میں کہا کہ صوبہ سندھ کے شہر عمر کوٹ، تھرپارکر، ٹنڈو اللہ یار، مٹیاری اور سانگھڑ جبکہ صوبہ پنجاب کے اضلاع رحیم یار خان اور بہاولپور میں گرمی کی لہر کا خطرہ ہے۔بیان کے مطابق صوبہ پنجاب اور سندھ میں مئی اور جون کے مہینے میں گرمی کی لہر متوقع ہے۔این ڈی ایم نے کہا ہے کہ 15 سے 30 مئی کے درمیان درجہ حرارت 40 سینٹی گریڈ تک جا سکتا ہے جبکہ جون میں 45 سینٹی گریڈ تک بڑھ سکتا ہے۔