اسپیکر ایاز صادق کی زیر صدارت قومی اسمبلی کا بجٹ اجلاس شروع ہوگیا ہے ۔
وفاقی وزیرخزانہ محمداورنگزیب بجٹ25-2024پیش کر رہے ہیں، وزیرخزانہ نے اپنی تقریر کے آغاز میں کہا مالی سال25-2024 کا بجٹ پیش کرنا میرے لیے بہت بڑے اعزاز کی بات ہے۔
فروری 2024کے انتخابات کے بعد مخلوط حکومت کا یہ پہلا بجٹ ہے،نوازشریف نے پاکستان میں 1990 میں معاشی اصلاحات کی بنیاد رکھی،شہبازشریف کی قیادت میں معاشی مسائل حل کرکے ترقی کی رفتار بڑھائیں گے۔
کچھ عرصہ پہلے پاکستان کی معیشت کو مشکلات کاسامنا تھا،محض ایک سال میں روپے کی قدر میں 10فیصد کمی ہوئی تھی،سیاسی اور معاشی چیلنجز کے باوجود حکومت کی معاشی طور پر پیشرفت متاثر کن رہی۔
تمام اراکین سے گزارش کرتا ہوں معاشی ترقی کی راہ میں حکومت کی معاونت کریں،مہنگائی کی وجہ سے لوگوں کی قوت خرید متاثر ہوئی،تنخواہ دار طبقہ مہنگائی سے خاص طور پر متاثر ہوا ہے۔
حکومت مشکلات کا احساس کرتے ہوئے ریلیف کیلئے اقدامات کررہی ہے،آج قدر ت نے پاکستان کو ترقی کی راہ پر چلنے کاموقع دیا ہے،موجودہ حکومت نے آئی ایم ایف کیساتھ اسٹینڈ بائی معاہدہ کیاجس پر تعریف کرنی ہوگی۔
ملک میں مہنگائی کم ہوکر 12 فیصد پرآگئی ہے،آنے والے دنوں میں مہنگائی میں مزید کمی کے امکانات ہیں،ملک معاشی بحران کی صورت سے نکل چکا ہے،ملکی معشیت کو درست کرنے کیلئے دن رات محنت کرنے کی ضرورت ہے۔
سرکاری ملازمین کی تنخواہوں میں اضافہ کررہے ہیں،1 سے 16 گریڈ کے سرکاری ملازمین کی قوت خرید بہتر بنانے کے لیے تنخواہوں میں 25 فیصد اضافہ کیا جا رہا ہے،گریڈ 17 سے 22 گریڈ تک افسران کی تنخواہوں میں22 اضافے کی تجویز ہے۔
ریٹائرڈ ملازمین کی پنشن میں 15 فیصد اضافہ کرنے کی تجویز ہے،اسی طرح کم سے کم ماہانہ تنخواہ کو32 ہزار روپے سے بڑھا کر 37 ہزار روپے کرنے کی تجویز ہے۔