ضلع سوات میں بارشوں سے مکان گرنے اور برساتی نالہ میں بہہ جانے سے 5 بچے جاں بحق جبکہ ایک خاتون زخمی ہوگئیں، جسے فوری طور پر اسپتال منتقل کردیا گیا۔
ضلع سوات کے علاقے مدین میں گجر بند شنکو میں مکان کی چھت گرنے کا واقعہ پیش آیا جس کے نتیجے میں 3 بچے جاں بحق جبکہ ایک خاتون زخمی ہوگئیں جسے فوری علاج معالجہ کے لیے اسپتال منتقل کر دیا گیا۔
دوسرا دلخراش واقعہ مالم جبہ سور ڈھیرئی میں پیش آیا جہاں 2 کمسن بھائی برساتی نالے میں بہہ گئے، دونوں بچوں کی لاشوں کو ریسکیو اہلکاروں نے پانی سے نکال کر لواحقین کے حوالے کر دیا۔
یاد رہے کہ بارشوں کی وجہ سے برساتی نالوں اور دریائے سوات میں پانی کا بہاؤ انتہائی زیادہ ہوگیا ہے۔