ایف آئی اے اینٹی ہیومن ٹریفکنگ سرکل نے بلوچستان کے علاقے تفتان میں انسانی اسمگلنگ کی بڑی کوشش ناکام بناتے ہوئے غیر قانونی طور پر بارڈر کراسنگ کی کوشش کرنے والے 20 غیر ملکی باشندوں کو گرفتار کر لیا۔
ترجمان ایف آئی اے کے مطابق کارروائی فرنٹیئر کور حکام کے تعاون سے عمل میں لائی گئی۔ گرفتار ملزمان کا تعلق بنگلا دیش سے ہے اور وہ وزٹ ویزے پر پاکستان آئے تھے۔ ملزمان ماشکیل بارڈر، ضلع چاغی کے راستے غیر قانونی طور پر سرحد پار کرنے کی کوشش کر رہے تھے۔
گرفتار افراد میں بابل حسین، میاں عارف، شوپان، عبداللہ، محمد کابل، مہدی حسن الامین، ساغر حسین، نجم الحسین، حبیب الرحمان، انارالحق، روجب علی، صوجب علی، اسد، روبل میاں، عرفات علی، ایمن اکونڈا اور شبیر علی شامل ہیں۔
ایف آئی اے حکام کا کہنا ہے کہ ملزمان سے قانونی دستاویزات طلب کی گئیں لیکن وہ تسلی بخش جواب نہ دے سکے جس پر انہیں ماشکیل بارڈر کے قریب حراست میں لے کر تفتیش کا آغاز کر دیا گیا ہے۔