اسلام آباد میں قومی اسمبلی کی ہاؤس بزنس ایڈوائزری کمیٹی کا اہم اجلاس اسپیکر قومی اسمبلی سردار ایاز صادق کی زیر صدارت ہوا، جس میں قومی اسمبلی کے 19 ویں اجلاس کے ایجنڈے اور دورانیے پر تفصیلی غور و خوض کیا گیا۔
اجلاس میں فیصلہ کیا گیا کہ قومی اسمبلی کے موجودہ 19 ویں اجلاس کو پاکستان کو درپیش وسیع اور شدید سیلابی صورتحال کے تناظر میں مختصر رکھا جائے گا۔ اس موقع پر یہ بھی طے پایا کہ اجلاس کے دوران وقفہ سوالات کو مؤخر کرتے ہوئے ایوان میں صرف سیلابی صورتحال پر خصوصی بحث کی جائے گی تاکہ عوام کو درپیش مسائل کو ترجیحی بنیادوں پر اٹھایا جاسکے۔
اسپیکر قومی اسمبلی سردار ایاز صادق نے اجلاس میں گفتگو کرتے ہوئے کہا کہ ان کی خواہش ہے کہ اپوزیشن ارکان قائمہ کمیٹیوں کا حصہ رہیں۔ انہوں نے اپوزیشن جماعتوں کے اراکین کو قائمہ کمیٹیوں سے مستعفی ہونے کے فیصلے پر نظرثانی کرنے کی درخواست بھی کی۔
اجلاس میں ڈپٹی اسپیکر قومی اسمبلی سید غلام مصطفیٰ شاہ، وفاقی وزیر ڈاکٹر طارق فضل چوہدری، سید نوید قمر، شیخ آفتاب احمد، خالد حسین مگسی، اعجاز حسین جاکھرانی، سید حفیظ الدین، پولین بلوچ، گل اصغر خان، نزہت صادق اور سیدہ شہلا رضا نے شرکت کی۔
کمیٹی نے اس امر پر زور دیا کہ ایوان میں ہونے والی بحث صرف اور صرف ملک کو درپیش حالیہ سیلابی تباہ کاریوں، متاثرین کی بحالی اور ممکنہ اقدامات پر مرکوز ہونی چاہیے تاکہ حکومت اور اپوزیشن مل کر عوامی مسائل کے حل کے لیے کردار ادا کرسکیں۔