وزیراعلیٰ بلوچستان میر سرفراز بگٹی نے قلعہ سیف اللہ میں عوامی اجتماع سے خطاب کرتے ہوئے کہا کہ دہشت گردی چاہے مذہب یا قومیت کے نام پر کی جائے، اس کا عوامی حقوق اور ترقی سے کوئی تعلق نہیں۔ انہوں نے کہا کہ بلوچستان کے عوام دہشت گردوں کے خلاف سیسہ پلائی ہوئی دیوار ہیں اور کسی صورت سرنڈر نہیں کریں گے۔
وزیر اعلیٰ نے کہا کہ مذہب کے نام پر بندوق اٹھانے والے دین دشمن ہیں کیونکہ اسلام امن اور بھائی چارے کا درس دیتا ہے۔ ان کے مطابق قوم پرستی یا حقوق کے نام پر ہتھیار اٹھانے والے ملک دشمن ایجنڈے پر عمل پیرا ہیں۔ انہوں نے واضح کیا کہ معصوم مسافروں اور شہریوں کا قتل ناقابلِ معافی جرم ہے۔
انہوں نے کوئٹہ میں سیاسی جلسے پر خودکش حملے کی شدید مذمت کرتے ہوئے کہا کہ بلوچستان کے عوام دہشت گردی کے خلاف متحد ہیں۔ ان کا کہنا تھا کہ پرامن احتجاج ہر شہری کا حق ہے لیکن سڑکیں بلاک کرنا اور عوام کو اذیت دینا آئین و قانون کے منافی ہے۔
وسائل کے حوالے سے گفتگو کرتے ہوئے میر سرفراز بگٹی نے کہا کہ بلوچستان کے معدنی وسائل پر پہلا حق مقامی عوام کا ہے اور ان کے حقوق پر ڈاکا ڈالنے کی اجازت نہیں دی جائے گی۔ انہوں نے اعلان کیا کہ صوبے کے وسائل پر قبضے کی کسی کوشش کو برداشت نہیں کیا جائے گا اور وہ عوام کے حقوق کے محافظ بن کر کھڑے رہیں گے۔
وزیر اعلیٰ بلوچستان نے قلعہ سیف اللہ میں ترقیاتی منصوبوں کا اعلان کرتے ہوئے کہا کہ پانی کے ضیاع کو روکنے کے لیے کان مہترزئی ڈیم تعمیر کیا جائے گا جبکہ مسلم باغ کو ضلع کا درجہ دیا جائے گا۔ انہوں نے کہا کہ قبائلی احترام اور بھائی چارے کا رشتہ اٹوٹ ہے اور کوئی طاقت اسے ختم نہیں کرسکتی۔