صوبہ خیبر پختونخوا کے 24 اسپتالوں کی نجکاری کے خلاف درخواست دائر کردی گئی۔
درخواست عباس خان سنگین ایڈووکیٹ نے پشاور ہائیکورٹ میں دائر کی ہے۔ درخواست میں موقف اپنایا گیا کہ حکومت کا یہ اقدام غریب عوام پر سرکاری اسپتالوں کے دروازے بند کردے گا، صحت بنیادی حق ہے، حکومت کو چاہیے کہ لوگوں کو فری صحت سہولیات دی جائیں۔
دائر درخواست میں مزید بتایا گیا ہے کہ آئین کے آرٹیکل 38 ڈی کے تحت مفت صحت سہولت ہر شہری کا بنیادی حق ہے، اسپتال کو ٹھیکے پر لینے والا ٹھیکیدار چیک اپ پرچی سمیت تمام قیمتیں بھی بڑھا دے گا۔
پشاور ہائیکورٹ میں صوبے کے 24 اسپتالوں کی نجکاری کیخلاف دائر درخواست میں یہ بھی بتایا گیا ہے کہ اسپتالوں کو ٹھیکے پر دینے سے صحت سہولیات کا معیار گر جائے گا، عدالت فوری طور پر حکومت کو اس اقدام سے روکے۔