اسلام آباد: وفاقی وزیر داخلہ محسن نقوی نے پمز اسپتال کا دورہ کیا اور آزاد کشمیر میں جھڑپوں کے دوران زخمی اسلام آباد اور آزاد کشمیر کے پولیس اہلکاروں کی عیادت کی۔
وزیر داخلہ فرداً فرداً ہر زخمی اہلکار کے پاس گئے اور ان کی خیریت دریافت کرتے ہوئے حوصلہ افزائی کی۔ محسن نقوی نے اسپتال انتظامیہ کو ہدایت دی کہ زخمی اہلکاروں کو بہترین طبی سہولتیں فراہم کی جائیں اور ان کے علاج میں کوتاہی نہ برتی جائے۔ اس موقع پر انہوں نے زخمی اہلکاروں کے جذبے اور بہادری کو خراجِ تحسین پیش کرتے ہوئے کہا کہ آپ سب نے انتہائی ہمت، حوصلے اور جوانمردی کے ساتھ اپنے فرائض سرانجام دیے۔ شرپسندی کے باوجود آپ نے تحمل اور صبر کا مظاہرہ کیا۔ آپ پاکستان کے بہادر سپوت ہیں اور ہم سب کو آپ پر ناز ہے۔
وفاقی وزیر داخلہ نے چیف کمشنر اسلام آباد اور آئی جی اسلام آباد کو ہدایت کی کہ زخمی اہلکاروں خصوصاً آزاد کشمیر پولیس کے جوانوں کا خصوصی خیال رکھا جائے۔
میڈیا سے گفتگو کرتے ہوئے محسن نقوی نے کہا کہ پرامن احتجاج ہر کسی کا حق ہے لیکن قانون ہاتھ میں لینے کی اجازت کسی کو نہیں دی جا سکتی۔ انہوں نے کہا کہ چند شرپسند عناصر دشمن کی ایماء پر آزاد کشمیر کے امن کو خراب کرنے کی کوشش کر رہے ہیں مگر ان کے مذموم مقاصد ہرگز کامیاب نہیں ہوں گے۔
اس موقع پر چیف کمشنر اسلام آباد، آئی جی اسلام آباد پولیس اور دیگر اعلیٰ حکام بھی وزیر داخلہ کے ہمراہ موجود تھے۔ پمز اسپتال میں اس وقت اسلام آباد پولیس کے 31 اور آزاد کشمیر پولیس کے 12 اہلکار زیر علاج ہیں۔