اوتھل مین آر سی ڈی ہائی وے زیرو پوائنٹ کے قریب کوچ اور ٹرک کے درمیان خوفناک تصادم کے نتیجے میں خاتون اور بچی سمیت 6 افراد جاں بحق جبکہ خواتین اور بچوں سمیت 16 مسافر شدید زخمی ہوگئے۔
حادثے کی اطلاع ملتے ہی ڈی ایس پی اوتھل حاصل خان قمبرانی، ایس ایچ او اوتھل جان محمد، ایڈیشنل ایس ایچ او شاہد اقبال، ریسکیو 1122، ایدھی، اور لسبیلہ ویلفیئر ٹرسٹ کے رضا کار فوری طور پر جائے حادثہ پر پہنچ گئے۔
ڈسٹرکٹ سپورٹ منیجر پی پی ایچ آئی حاجی خان، انچارج ایدھی بلوچستان ڈاکٹر عبدالحکیم لاسی، اور انچارج لسبیلہ ویلفیئر ٹرسٹ عرفان رمضان جاموٹ نے ایمبولینسوں اور ریسکیو ٹیموں کی قیادت کرتے ہوئے امدادی کارروائی میں حصہ لیا۔ نعشوں اور زخمیوں کو فوری طور پر ڈسٹرکٹ ہیڈ کوارٹر اسپتال اوتھل منتقل کیا گیا جہاں میڈیکل سپرنٹنڈنٹ ڈاکٹر عمران خان کی سربراہی میں میڈیکل ٹیم نے زخمیوں کو بروقت طبی امداد فراہم کی۔ شدید زخمیوں کو مزید علاج کے لیے کراچی ریفر کردیا گیا۔
حادثے کی اطلاع پر ڈپٹی کمشنر لسبیلہ حمیرا بلوچ بھی فوری طور پر ڈی ایچ کیو اسپتال اوتھل پہنچیں اور زخمیوں کو فراہم کی جانے والی طبی سہولیات کا جائزہ لیا۔