خیبر پختونخوا میں نئے وزیراعلیٰ کے انتخاب سے قبل پاکستان تحریکِ انصاف نے اپنے اراکینِ صوبائی اسمبلی کو خصوصی ہدایات جاری کر دی ہیں تاکہ کسی بھی ممکنہ سیاسی ہلچل یا اراکین کے غائب ہونے کے خدشے سے بچا جا سکے۔
ذرائع کے مطابق پارٹی کی جانب سے اراکین کو ہدایت کی گئی ہے کہ وہ غیر ضروری سفر سے گریز کریں اور ملک میں اپنی موجودگی یقینی بنائیں۔ یہ اقدامات وزیراعلیٰ کے انتخاب کےمرحلے میں اراکین کی دستیابی کو یقینی بنانے کے لیے کیے گئے ہیں۔
پی ٹی آئی کے ذرائع کا کہنا ہے کہ بعض حلقوں کی جانب سے اراکینِ اسمبلی کو توڑنے یا انحراف پر آمادہ کرنے کی کوششیں کی جا رہی ہیں تاہم اب تک کوئی بھی رکن پارٹی سے علیحدہ نہیں ہوا۔ الیکشن کمیشن نے پی ٹی آئی کے اراکین کو آزاد قرار دیا ہے جس کے باعث اگر کوئی رکن سہیل آفریدی کو ووٹ نہ بھی دے تو وہ نااہلی کے زمرے میں نہیں آئے گا۔
صوبائی صدر پی ٹی آئی جنید اکبر خان نے سماجی رابطے کی ویب سائٹ ایکس پر پیغام دیتے ہوئے کہا کہ تمام ایم پی ایز ملک میں اپنی موجودگی یقینی بنائیں اگر کسی سیاسی جماعت کی جانب سے رابطہ ہو تو فوری طور پر قیادت کو آگاہ کریں بصورتِ دیگر پارٹی سخت کارروائی کرے گی۔
جنید اکبر کے پیغام کے بعد اراکینِ صوبائی اسمبلی نے پارٹی قیادت سے مسلسل رابطہ برقرار رکھا ہوا ہے۔ پارٹی ذرائع کا کہنا ہے کہ وزیراعلیٰ کے انتخاب کا مرحلہ انتہائی اہم ہے اور پی ٹی آئی کو یقین ہے کہ اس موقع پر اپنے تمام 92 اراکین کی حاضری یقینی بنائی جائے گی تاکہ سہیل آفریدی کو کامیاب کروایا جا سکے۔