امریکا نے کولمبیا کے صدر گستاؤ پیٹرو پر منشیات کی اسمگلنگ اور غیر قانونی سرگرمیوں میں ملوث ہونے کے الزامات کے تحت پابندیاں عائد کر دی ہیں۔
غیر ملکی میڈیا کے مطابق پابندیوں کے تحت صدر پیٹرو کے امریکا میں موجود اثاثے منجمد کر دیے گئے ہیں اور امریکی شہریوں کو ان کے ساتھ کسی بھی مالی لین دین سے روک دیا گیا ہے۔ امریکی حکام کا کہنا ہے کہ یہ اقدام خطے میں منشیات کی اسمگلنگ اور بدعنوانی کے خلاف واشنگٹن کے عزم کا حصہ ہے۔
صدر پیٹرو نے ان الزامات کی سختی سے تردید کی اور کہا کہ کولمبیا میں منشیات فروشوں کے خلاف ریکارڈ کارروائیاں کی گئی ہیں اور کئی جرائم پیشہ نیٹ ورکس ختم کیے گئے ہیں۔
کولمبیا کی حکومت نے بھی امریکی فیصلے پر شدید ردعمل ظاہر کرتے ہوئے کہا کہ یہ پابندیاں سیاسی نوعیت کی ہیں اور کولمبیا کے اندرونی معاملات میں مداخلت کے مترادف ہیں۔
واضح رہے کہ اس سے قبل امریکی صدر ڈونلڈ ٹرمپ نے کولمبیا پر تمام فنڈنگ بند اور محصولات میں اضافے کی دھمکی دی تھی۔تجزیہ کاروں کا کہنا ہے کہ اس اقدام سے دونوں ممالک کے درمیان تعلقات میں مزید کشیدگی پیدا ہو سکتی ہے۔