اسلام آباد فوڈ اتھارٹی نے وفاقی دارالحکومت میں غیر رجسٹرڈ فوڈ پوائنٹس اور ریسٹورنٹس کے خلاف یکم دسمبر سے سخت کریک ڈاؤن کا فیصلہ کرلیا ہے۔
اتھارٹی کی جانب سے تمام فوڈ پوائنٹس اور ریسٹورنٹس مالکان کو 30 نومبر تک لازمی طور پر رجسٹریشن مکمل کرنے کی ہدایت کی گئی ہے۔
ڈائریکٹر فوڈ اتھارٹی کے مطابق 30 نومبر کی ڈیڈ لائن کے بعد کسی بھی غیر رجسٹرڈ فوڈ پوائنٹ یا ریسٹورنٹ کو کام کرنے کی اجازت نہیں دی جائے گی۔
فیصلے کے تحت یکم دسمبر سے روزانہ کی بنیاد پر انسپکشنز ہوں گی اور قواعد و ضوابط پر پورا نہ اترنے والی اور غیر رجسٹرڈ دکانوں کو نہ صرف سیل کیا جائے گا بلکہ بھاری جرمانے بھی عائد کیے جائیں گے۔
ڈائریکٹر فوڈ اتھارٹی نے تمام ریسٹورنٹس اور فوڈ پوائنٹس مالکان سے اپیل کی ہے کہ شہریوں کی صحت اور فوڈ سیفٹی کو مدنظر رکھتے ہوئے مقررہ وقت کے اندر رجسٹریشن کا عمل مکمل کریں، تاکہ کسی بھی قسم کی قانونی کارروائی سے بچا جا سکے۔