کراچی چڑیا گھر میں 16 نومبر کو شیرنی نے تین صحت مند بچوں کو جنم دیا۔چڑیا گھر کے ترجمان کے مطابق پیدائش کے فوراً بعد ان ہاؤس ویٹرنری ڈاکٹرز نے بچوں کا تفصیلی معائنہ کیا اور انہیں مکمل صحت مند قرار دیا۔ مادہ شیرنی بھی صحت مند ہے اور اس کی خصوصی دیکھ بھال جاری ہے۔
میئر کراچی بیرسٹر مرتضیٰ وہاب نے اس موقع پر خوشی کا اظہار کرتے ہوئے کہا کہ یہ شہر اور جنگلی حیات سے محبت کرنے والوں کے لیے خوشی کی خبر ہے۔ انہوں نے چڑیا گھر انتظامیہ کو ہدایت کی کہ شیر کے بچوں کی خصوصی دیکھ بھال کی جائے اور انہیں فی الحال عوامی نمائش کے لیے پیش نہ کیا جائے۔ بچوں کو ڈاکٹروں کی اجازت کے بعد مرحلہ وار عوام کے سامنے متعارف کرایا جائے گا۔
چڑیا گھر انتظامیہ کے مطابق جانوروں کے باڑوں کی اپ گریڈیشن، ویٹرنری سہولیات میں بہتری، غذائی منصوبہ بندی اور ماحول دوست اقدامات نے چڑیا گھر کے معیار میں نمایاں اضافہ کیا ہے۔
میئر کراچی نے مزید کہا کہ کراچی چڑیا گھر میں دیگر جانوروں کے ہاں بھی بچوں کی ولادت متوقع ہے جو اس بات کا ثبوت ہے کہ چڑیا گھر کا ماحول جانوروں کے لیے موزوں اور محفوظ ہے۔
چڑیا گھر انتظامیہ نے یقین دہانی کرائی کہ شیر کے بچوں کو مناسب دیکھ بھال اور محفوظ ماحول فراہم کرنے کے بعد انہیں عوام کے سامنے پیش کیا جائے گا تاکہ شہری نہ صرف تفریح بلکہ تعلیمی اور تحقیقی سہولت کے طور پر چڑیا گھر کا بھرپور فائدہ اٹھا سکیں۔