کراچی کی تاریخ میں پہلی مرتبہ سڑکوں پر ایمبولینسوں کے لیے مخصوص لین باقاعدہ طور پر فعال کر دی گئی ہے۔ پہلی ایمبولینس لین شہر کے مصروف تجارتی علاقے صدر کی مینسفیلڈ اسٹریٹ پر قائم کی گئی ہے۔
ڈپٹی کمشنر جنوبی جاوید نبی کھوسو کے مطابق یہ خصوصی لین تجاوزات کے خلاف کارروائی کے بعد فعال کی گئی تاکہ ہنگامی حالات میں ایمبولینسوں کو بلا رکاوٹ راستہ فراہم کیا جائے۔ انہوں نے بتایا کہ شہری جانوں کے تحفظ اور ریسکیو سسٹم کی بہتری اولین ترجیح ہے۔
ڈپٹی کمشنر نے مزید کہا کہ ضلع جنوبی کی دیگر اہم سڑکوں پر بھی اسی طرز کی خصوصی ایمبولینس لینز جلد فعال کی جائیں گی تاکہ ہنگامی خدمات مزید تیزی اور مؤثر انداز میں فراہم کی جا سکیں۔