گورنر سندھ کامران خان ٹیسوری سے متحدہ عرب امارات کے قونصل جنرل عتیق بخیت الرومیتی نے گورنر ہاؤس میں ملاقات کی جس میں پاک، یو اے ای تعلقات، تجارت اور سرمایہ کاری کے فروغ پر تفصیلی تبادلہ خیال ہوا۔
ملاقات کے دوران یو اے ای کے قونصل جنرل نے گورنر سندھ کو 2 دسمبر کو ہونے والی متحدہ عرب امارات کے قومی دن کی تقریب میں مہمانِ خصوصی کے طور پر شرکت کی دعوت دی۔
گورنر سندھ نے قونصل جنرل عتیق بخیت الرومیتی کی سفارتی خدمات کو خراجِ تحسین پیش کرتے ہوئے انہیں گولڈ میڈل اور تعریفی اسناد بھی پیش کیں۔ اس موقع پر انہوں نے کہا کہ پاکستان اور یو اے ای کے تعلقات اعتماد، احترام اور مضبوط دوستی کی بنیاد پر قائم ہیں۔
دونوں رہنماؤں نے تجارت، سرمایہ کاری، اقتصادی سرگرمیوں اور باہمی تعاون میں مزید تیزی لانے پر بھی گفتگو کی۔ یو اے ای کے قونصل جنرل نے اس عزم کا اظہار کیا کہ پاکستان اور متحدہ عرب امارات کے دیرینہ برادرانہ تعلقات آئندہ بھی مضبوطی کے ساتھ آگے بڑھتے رہیں گے۔