وزیر اعلیٰ خیبر پختونخوا محمد سہیل آفریدی کی ہدایات پر صوبائی انسپکشن ٹیم نے خیبر پختونخوا کے کھیلوں کے دو اہم ترقیاتی منصوبوں میں بے ضابطگیوں کی تحقیقات کا آغاز کر دیا ہے۔
انسپکشن ٹیم نے محکمہ کھیل خیبر پختونخوا کو فوری طور پر تمام متعلقہ ریکارڈ جمع کرانے کی ہدایت کی ہے اور ایک رابطہ کار آفیسر نامزد کرنے کو کہا ہے تاکہ تحقیقات میں تاخیر نہ ہو۔
صوبائی انسپکشن ٹیم کے مراسلے میں سیکرٹری کھیل اور ڈائریکٹر جنرل کھیل کو واضح کیا گیا ہے کہ ترقیاتی منصوبوں کے دستاویزات اور ریکارڈ فراہم کرنا لازمی ہے جس میں کھیلوں کی سہولیات فراہم کرنے کے منصوبے اور یونین کونسل سطح پر کھیلوں کے میدانوں کی تعمیر شامل ہیں۔
تاہم، ابھی تک محکمہ کھیل کی جانب سے کسی بھی آفیسر کو نامزد نہیں کیا گیا جس کے سبب تحقیقات میں تاخیر ہو رہی ہے۔ انسپکشن ٹیم نے تاکید کی ہے کہ معاملہ مقررہ وقت میں مکمل ہونا ضروری ہے اور اسے فوری ترجیحی بنیادوں پر نمٹایا جائے۔