فیلڈ مارشل سید عاصم منیر سے مصر کے وزیرِ خارجہ ڈاکٹر بدر احمد محمد عبدالعاطی کی ملاقات ہوئی جس میں دوطرفہ دفاعی و سیکیورٹی تعاون مزید وسیع کرنے پر اتفاق کیا گیا۔
آئی ایس پی آر کے مطابق ملاقات میں پاکستان اور مصر کے درمیان دفاعی تعلقات، ملٹری ٹو ملٹری تعاون، تربیتی شراکت داری اور علاقائی امن و استحکام سے متعلق امور پر تفصیلی تبادلہ خیال کیا گیا۔ دونوں رہنماؤں نے اسٹریٹجک شعبوں میں قریبی تعاون کو نئی سطح تک لے جانے کے عزم کا اعادہ کیا۔
مصری وزیرِ خارجہ نے مصر کی قیادت کی جانب سے نیک خواہشات پہنچاتے ہوئے پاکستان کے ساتھ مختلف شعبوں میں تعاون بڑھانے میں گہری دلچسپی کا اظہار کیا۔ فریقین نے بدلتے ہوئے علاقائی چیلنجز کے تناظر میں اعلیٰ سطح کے روابط برقرار رکھنے کی ضرورت پر بھی زور دیا۔
ترجمان پاک فوج کے مطابق ملاقات خوشگوار ماحول میں ہوئی جس میں دونوں ممالک نے بھائی چارے، شراکت داری اور دیرینہ تعلقات کو مزید مضبوط بنانے کا عزم دہرایا۔