وزیرِ اعلیٰ پنجاب مریم نواز شریف نے لاہور ڈیولپمنٹ پلان کے فیز ٹو کا باضابطہ آغاز کردیا ہے، جس کے ساتھ شہرِ لاہور میں ترقی و بحالی کا نیا دور شروع ہوگیا ہے۔
اجلاس کی صدارت کرتے ہوئے وزیرِ اعلیٰ مریم نواز شریف کو فیز ٹو سے متعلق تفصیلی بریفنگ دی گئی، جس میں شہر کی 6 ہزار 284 گلیوں کی مکمل اپ گریڈیشن کا منصوبہ پیش کیا گیا۔ وزیرِ اعلیٰ نے تمام اداروں کو ترقیاتی کاموں میں معیار پر کسی قسم کا سمجھوتہ نہ کرنے کی سخت ہدایت جاری کی۔
حکومتی شیڈول کے مطابق، آئندہ سال 30 جون تک لاہور میونسپل کارپوریشن کی 5,798 گلیاں، واسا کی 486 گلیاں جدید، صاف، محفوظ اور قابلِ فخر معیار پر اپ گریڈ کی جائیں گی۔
وزیرِ اعلیٰ مریم نواز شریف نے کہا کہ لاہور کے ہر محلے کو روشن، آباد اور ٹوٹ پھوٹ سے مکمل آزاد بنایا جائے گا۔ ان کا کہنا تھا کہ 6 ہزار سے زائد گلیوں کی اپ گریڈیشن کے بعد لاہور کا ہر محلہ رہائش کے لیے فخر کی علامت بنے گا۔
اجلاس میں ضلعی انتظامیہ اور متعلقہ اداروں کو مرحلہ وار ماہانہ ورک پلان بھی پیش کیا گیا، جبکہ وزیرِ اعلیٰ نے واضح کیا کہ لاہور ڈیولپمنٹ پلان فیز ٹو کی تکمیل میں کسی قسم کی تاخیر برداشت نہیں کی جائے گی۔