اسپیکر قومی اسمبلی سردار ایاز صادق آج بنگلا دیش کے دارالحکومت ڈھاکا کے لیے روانہ ہو گئے ہیں۔ وہ سابق وزیراعظم اور بنگلا دیش نیشنلسٹ پارٹی کی سربراہ خالدہ ضیا کی نمازِ جنازہ میں شرکت کریں گے۔
دورے کے دوران سپیکر قومی اسمبلی بنگلا دیش کی عبوری حکومت کے اعلیٰ حکام سے ملاقاتیں کریں گے، جن میں باہمی دلچسپی کے امور، دوطرفہ تعلقات اور پارلیمانی تعاون پر تبادلہ خیال کیا جائے گا۔
سردار ایاز صادق خالدہ ضیا کے اہلِ خانہ سے ملاقات کے دوران حکومتِ پاکستان اور پاکستانی عوام کی جانب سے دلی تعزیت اور ہمدردی کا بھی اظہار کریں گے۔ انہوں نے خالدہ ضیا کی سیاسی خدمات اور جمہوریت کے فروغ کے لیے کی گئی جدوجہد کو خراجِ تحسین پیش کرنے کا بھی اعلان کیا ہے۔