پاکستان ایئر فورس نے مقامی طور پر تیار کردہ تیمور ویپن سسٹم کا کامیاب فلائٹ ٹیسٹ کر لیا، جو قومی ایئرواسپیس اور دفاعی صلاحیتوں میں ایک اہم سنگِ میل ہے۔ آئی ایس پی آر کے مطابق تیمور ایک ایئر لانچڈ کروز میزائل ہے جو 600 کلومیٹر تک زمینی اور بحری اہداف کو انتہائی درستگی کے ساتھ نشانہ بنانے کی صلاحیت رکھتا ہے اور روایتی وارہیڈ سے لیس ہے۔
بیان میں کہا گیا ہے کہ جدید نیویگیشن اور گائیڈنس سسٹم سے مزین تیمور کم بلندی پر پرواز کرتے ہوئے دشمن کے فضائی اور میزائل دفاعی نظام کو مؤثر انداز میں چکمہ دینے کی صلاحیت رکھتا ہے۔ اس کی درست حملے کی صلاحیت پاکستان ایئر فورس کی روایتی دفاعی طاقت اور آپریشنل لچک میں نمایاں اضافہ کرے گی۔
کامیاب تجربہ ملکی دفاعی صنعت کی تکنیکی پختگی، جدت اور خود انحصاری کا مظہر ہے۔ تجربے کے موقع پر پاک افواج کے سینئر افسران کے علاوہ میزائل کی تیاری میں اہم کردار ادا کرنے والے سائنسدان اور انجینئرز بھی موجود تھے۔
چیف آف ایئر اسٹاف ایئر چیف مارشل ظہیر احمد بابر سدھو نے اس کامیابی پر سائنسدانوں، انجینئرز اور پوری پی اے ایف ٹیم کو مبارکباد دی اور ان کی پیشہ ورانہ مہارت، لگن اور قومی دفاع کے لیے خدمات کو سراہا۔ ان کا کہنا تھا کہ ایسی کامیابیاں پاکستان کے تکنیکی خود کفالت کے عزم اور بدلتی ہوئی علاقائی سکیورٹی صورتحال میں قابلِ اعتماد روایتی دفاع کے تسلسل کی عکاس ہیں۔
وزیراعظم محمد شہباز شریف نے پاکستان فضائیہ کی جانب سے مقامی طور پر تیار کردہ تیمور ویپن سسٹم کے کامیاب تجربے پر پوری قوم کو مبارکباد دی ہے۔
وزیراعظم نے اس اہم کامیابی پر پاکستان فضائیہ کو خراجِ تحسین پیش کرتے ہوئے کہا کہ یہ کامیاب فلائٹ ٹیسٹ پاکستان کی دفاعی صنعت کی تکنیکی پختگی، جدت اور خود انحصاری کا واضح ثبوت ہے۔ انہوں نے کہا کہ تیمور ویپن سسٹم کی بدولت ملک کے دفاع کو مزید مضبوط بنانے میں مدد ملے گی۔