امریکی صدر ڈونلڈ ٹرمپ نے کہا ہے کہ دنیا بھر کے ممالک کے خلاف امریکی فوجی حملے یا جارحیت کا حکم دینے کا مکمل اختیار ان کے پاس ہے۔ ایک بیان میں انہوں نے کہا کہ بحیثیت کمانڈر اِن چیف اپنے اختیارات کی حد کا تعین وہ خود کرتے ہیں اور انہیں روکنے والی واحد چیز ان کی اپنی اخلاقیات اور سوچ ہے۔
نیویارک ٹائمز کو دیے گئے انٹرویو میں ڈونلڈ ٹرمپ نے ایک سال سے زائد عرصے تک وینزویلا کے معاملات کنٹرول میں رکھنے اور وہاں کے تیل پر قبضہ رکھنے کے عزائم کا بھی اظہار کیا۔
دوسری جانب امریکی سینیٹ نے ٹرمپ کو وینزویلا کے خلاف مزید جارحیت سے روکنے کے لیے ایک قرارداد بحث کے لیے منظور کرلی ہے۔ غیر ملکی میڈیا کے مطابق ری پبلکن پارٹی کے پانچ ارکان نے بھی اس قرارداد کے حق میں ووٹ دیا۔
ادھر امریکی نائب صدر جے ڈی وینس نے وینزویلا میں کارروائی کا دفاع کرتے ہوئے کہا ہے کہ اس سے امریکی عوام کو فائدہ ہوگا۔ ان کے مطابق امریکا کو وینزویلا کے قدرتی وسائل تک رسائی ملے گی اور دشمنوں پر بالادستی حاصل ہوگی۔