کویت کی ایک فوجداری عدالت نے منشیات کی بھاری مقدار اسمگل کرنے کے جرم میں دو بھارتی شہریوں کو سزائے موت سنا دی ہے۔ عرب میڈیا کے مطابق عدالت نے یہ فیصلہ شواہد اور استغاثہ کے دلائل کی بنیاد پر سنایا۔
رپورٹ کے مطابق ملزمان کو کویت کے علاقوں کیفان اور شوویخ سے گرفتار کیا گیا تھا جہاں سے 14 کلوگرام ہیروئن، 8 کلوگرام میتھ ایمفیٹامین اور دو الیکٹرانک وزن تولنے والی مشینیں برآمد ہوئیں۔
عدالت میں استغاثہ نے ثابت کیا کہ دونوں افراد ایک بین الاقوامی منشیات اسمگلنگ نیٹ ورک کا حصہ تھے جو کویت سے باہر سے آپریٹ کر رہا تھا۔ کویت کی وزارت داخلہ کے مطابق خفیہ معلومات اور کڑی نگرانی کے بعد تفتیشی اداروں نے کارروائی کرتے ہوئے ملزمان کو گرفتار کیا۔