محکمہ موسمیات نے 16 سے 25 جنوری کے دوران شدید سردی سے متعلق گردش کرنے والی خبروں کو مسترد کرتے ہوئے کہا ہے کہ ملک میں کسی غیر معمولی یا ریکارڈ توڑ سردی کی لہر کا کوئی امکان نہیں۔
پی ایم ڈی کے مطابق موسمیاتی ماڈلز سے ظاہر ہوتا ہے کہ آئندہ دنوں میں درجہ حرارت مجموعی طور پر معمول کی حد میں رہے گا جبکہ سوشل میڈیا پر پھیلائی جانے والی شدید سردی کی پیشگوئیاں گمراہ کن اور غیر تصدیق شدہ ہیں۔ محکمہ موسمیات نے واضح کیا کہ ریکارڈ توڑ یا تاریخی سردی سے متعلق کوئی پیشگوئی جاری نہیں کی گئی۔
محکمہ موسمیات نے عوام سے اپیل کی ہے کہ وہ صرف سرکاری موسمیاتی اطلاعات، وارننگز اور ایڈوائزریز پر ہی انحصار کریں اور غیر تصدیق شدہ موسمی معلومات پھیلانے سے گریز کریں۔
پی ایم ڈی کے مطابق ملک بھر میں شدید یا وسیع پیمانے پر غیر معمولی سردی کا کوئی امکان نہیں۔ آج کم سے کم درجہ حرارت 9 ڈگری سینٹی گریڈ ریکارڈ کیا گیا جبکہ زیادہ سے زیادہ درجہ حرارت 24 ڈگری سینٹی گریڈ تک جانے کا امکان ہے۔